Astanada búrkitshilerdiń I Halyqaralyq festıvali bastaldy
Jıyndy ashqan QR Ulttyq sport túrleri qaýymdastyǵynyń prezıdenti Qaırat Satybaldy atap kórsetkendeı, elimizde tuńǵysh ret ótip jatqan búrkitshilerdiń halyqaralyq festıvaline álemniń 12 eliniń qusbegileri qatysýda. Olardyń ishinde Qytaı, Mońǵolııa, Qyrǵyzstan, Avstrııa, Chehııa, Vengrııa, Italııa, Slovakııa jáne Ózbekstannyń saıatshylary bar. «Qazaqtyń sózimen aıtsaq, bul kún - óshkenimizdiń janyp, ólgenimizdiń tirilgen kúni. Bir kezderi úzilýge jaqyndaǵan zamannan aman-esen ótip, qolymyz aýzymyzǵa jetip, Táýelsizdik alǵannan keıin ulttyq dástúrimizdi ulyqtaıtyn jaǵdaıǵa da jettik. Sonyń biri - qusbegilik boıynsha búrkitshilerdiń halyqaralyq festıvalin ótkizýge bizdiń quqyǵymyz bar dep bilemiz. Sebebi bul dástúr dál osy jerden bastaý alady», - dep atap kórsetti Q.Satybaldy.
Aıta keteıik, búgingi keńespen qatar Astanaǵa jaqyn ornalasqan Qoıandy mańyndaǵy «Bal qaraǵaı» demalys kesheninde búrkitshilerdiń halyqaralyq saıysy bastaldy. Aqtyq syndar erteń, qarashanyń 30-y kúni ótedi.
