Astanada burynǵy áıelin ańdyǵan adam jazaǵa tartyldy
ASTANA. KAZINFORM – Astanada stalkıng qylmysy boıynsha sot sheshim shyǵardy.
Elorda turǵyny qorǵaý nusqamasynyń talaptaryna qaramastan, tórt aı boıy burynǵy birge turǵan áıeldi zańsyz qýdalaǵan: oǵan qońyraý shalyp, habarlamalar jibergen, turǵylyqty jerine barǵan, úıiniń mańynda kútip turǵan jáne balaǵat sózder aıtqan.
Nátıjesinde jábirlenýshi óziniń jáne kámeletke tolmaǵan qyzynyń qaýipsizdigi úshin únemi alańdap, qorqynysh seziminde bolǵan, onyń jeke qaýipsizdikke jáne erkin qarym-qatynas jasaýǵa degen quqyqtary buzylǵan.
Memlekettik aıyptaýshy sottalýshynyń kinásin dáleldedi.
Sot oǵan 100 saǵat qoǵamdyq jumys túrindegi jaza taǵaıyndady.
Úkim zańdy kúshine endi.
Astana qalasynyń prokýratýrasy stalkıng, ıaǵnı kúsh qoldanýmen baılanysty emes, adamnyń erkine qarsy baılanys ornatýǵa jáne (nemese) ony ańdýǵa baǵyttalǵan áreketter arqyly kórinis tabatyn, eleýli zııan keltirgen zańsyz qýdalaý úshin elý táýlikke deıin qamaýǵa alý túrindegi qylmystyq jaýaptylyq kózdelgenin eske saldy.
Aıta keteıik, Qazaqstanda stalkıng buryn jeke másele retinde qarastyrylsa, búginde ol qylmystyq jaýapkershilikke ákeletin quqyqbuzýshylyqqa aınaldy. Bul baǵyttaǵy tájirıbeniń qalaı qalyptasyp jatqany jáne jańa qorǵaý tetikteriniń qanshalyqty tıimdi ekeni Jibek Joly radıosyndaǵy «V kontekste» qoǵamdyq-saıası tok-shoýynda talqylandy.
