Astanada buryn sotty bolǵan 306 adam jumysqa ornalastyryldy
ASTANA. KAZINFORM — Astanada burynǵy sottalǵan azamattarǵa jumysqa ornalasý, baspana jáne qarjylaı kómek kórsetiledi. Bıyl 653 adam qoldaýǵa ıe bolyp, 306-sy turaqty jumysqa ornalasqan. Bul týraly Astana qalasynyń ákimdigi málim etti.
Astanada bas bostandyǵynan aıyrý oryndarynan bosap shyqqan jáne jazasyn qoǵamnan oqshaýlaýsyz ótep júrgen azamattardy áleýmettik beıimdeý jáne jumyspen qamtý máselelerine arnalǵan dóńgelek ústel ótti.
Kezdesý barysynda qoǵamdyq uıymdar men memlekettik qurylymdar birlesken jobalardyń alǵashqy nátıjelerin tanystyryp, qaıta áleýmettendirý úderisin tsıfrlandyrýdy usyndy.
«Ońaltý tehnologııalary men tujyrymdamalary» qoǵamdyq qorynyń ókilderi Astana qalasynyń Jumyspen qamtý jáne áleýmettik qorǵaý basqarmasynyń memlekettik áleýmettik tapsyrysy aıasyndaǵy jumystardyń aralyq qorytyndysyn tanystyrdy. Mamandar bas bostandyǵynan aıyrý oryndarynan oralǵan azamattarǵa zań kómeginen bastap, jeke isin ashýǵa deıin keshendi qoldaý kórsetip keledi.
— 2026 jyldyń qyrkúıegine deıin qorymyzǵa 653 azamat tirkeldi. Olarǵa túrli baǵytta kómek kórsettik. 306 adam turaqty jumysqa ornalastyryldy, taǵy 34 azamat jeke kásipker retinde tirkelip, óz isin bastady. Sonymen qatar 146 adam psıhodıagnostıkalyq tekserýden ótip, 63 azamat quqyqtyq keńes aldy. Alaıda 73 adam ázirge jumyssyz otyr. Sondyqtan bizdiń mindetimiz — árqaısysyna qoǵamnan óz ornyn tabýǵa kómektesý, — dedi «Ońaltý tehnologııalary men tujyrymdamalary» qoǵamdyq qorynyń dırektory Orynbasar Quljabaeva.
Praktıkalyq jumys nátıjesinde qor memlekettik organdarǵa birqatar usynys ázirledi. Atap aıtqanda, bos jumys oryndaryn tıimdi irikteý jáne qamqorlyqtaǵy azamattardy súıemeldeý úshin jasandy ıntellekt tehnologııalary men tsıfrlyq servısterdi engizý, sondaı-aq mamandandyrylǵan «Áleýmettendirý jáne ońaltý» ortalyǵyn ashýǵa qoldaý kórsetý usynyldy. Sonymen qatar sottalǵandardy jazasyn óteý kezeńinde-aq bostandyqqa shyǵýǵa júıeli túrde daıyndaýǵa erekshe mán berildi.
— 2026 jyldyń segiz aıynda departament bólimshelerinen 485 sottalǵan adam bosap shyqty. Olardy bostandyqqa daıyndaý mekemege kelgen sátten bastalady. Olar mamandyq alyp, qujattaryn jáne áleýmettik baılanystaryn qalpyna keltiredi. Birde-bir adam nazardan tys qalmaıdy. Azamattyń oralýyna tıisti organdar aldyn ala daıyndalýy úshin biz ákimdikterge, ishki ister organdaryna jáne probatsııa qyzmetine 883 habarlama joldadyq, — dedi Astana qalasy boıynsha QAJ departamentiniń sottalǵandar arasyndaǵy tárbıe jáne áleýmettik-psıhologııalyq jumys bóliminiń bastyǵy Ásel Maqasheva.
Bostandyqtaǵy ómirge qaıta beıimdelý birneshe memlekettik organnyń úılesimdi jumysyn talap etedi. Ásirese baspanasy nemese kúnkóris qarajaty joq azamattarǵa bul baǵytta keshendi qoldaý qajet. Osyndaı jaǵdaılarǵa baılanysty elordada shuǵyl qoldaý jáne áleýmettik kómek kórsetýge arnalǵan arnaıy baǵdarlamalar jumys isteıdi.
— Jyl basynan beri Astanany turǵylyqty jeri retinde tańdaǵan 67 azamat bosap shyqty. Onyń 23-i áleýmettik-quqyqtyq kómekke asa muqtaj boldy. Biz 11 adamdy beıimdeý ortalyqtary men baspanalarǵa ornalastyrdyq. Sonymen qatar Jumyspen qamtý basqarmasymen birlesip, «Qaqpa aldyndaǵy kezdesý» jobasy júzege asyrylyp jatyr. Qazirdiń ózinde osyndaı 9 kezdesý ótkizildi. Onda azamattarǵa túrmeden shyqqan sátten bastap alǵashqy qajetti kómek kórsetiledi. Budan bólek, bosap shyqqan azamattarǵa 15 AEK-ke deıin, ıaǵnı 64 875 teńge mólsherinde birjolǵy tólem alýǵa múmkindik qarastyrylǵan, — dedi Ásel Maqasheva.
Kezdesý sońynda qatysýshylar azamattardyń qoǵamǵa sátti beıimdelýiniń negizgi sharttarynyń biri — resmı jumysqa ornalasý ekenin atap ótti. 2026 jyly sottylyǵy bar azamattarǵa belgilengen jumys oryndary kvotasy aıasynda 21 adam jumysqa ornalastyryldy.
Qoǵamdyq uıymdar men QAJ departamentiniń ókilderi jumys berýshilerdi eńbek zańnamasyn qatań saqtaýǵa, al memlekettik organdardy burynǵy sottalǵandardyń qarjylyq máselelerin sheshýge, sonyń ishinde bank shottaryn buǵattaýdan shyǵarýǵa jáne bankrottyq rásimderinen ótýge járdemdesýge shaqyrdy.
Eske sala keteıik, buǵan deıin Qaraǵandyda 180 sottalǵan kásip meńgerýdi bastaǵan bolatyn.
