Astanada «Búldirshinderge arnalǵan qazaq tili» ádistemeleri respýblıkalyq baıqaýynyń qorytyndysy shyǵaryldy
ASTANA. Aqpannyń 9-y. QazAqparat /Gúlmıra Álıakparova/ - Búgin Astanadaǵy Ulttyq baspasóz ortalyǵynda «Búldirshinderge arnalǵan qazaq tili» ádistemeleri respýblıkalyq baıqaýynyń qorytyndysy jarııalanyp, jeńimpazdar marapattaldy,
dep habarlaıdy QazAqparat.
2009 jyldyń sáýiri men jeltoqsany aralyǵynda ótken baıqaýdy - til úıretýdegi ınnovatsııalyq úrdister men tıimdi ádistemelik quraldardy engizý, osy saladaǵy ustazdar ujymy men qoǵamdyq uıymdardy yntalandyrý jáne qoldaý maqsatynda Memlekettik tildi damytý Prezıdenttik qory uıymdastyrdy.
Qazylar alqasynyń tóraǵasy, Qordyń qamqorshylyq keńesiniń múshesi jáne Prezıdenttik Mádenıet ortalyǵynyń dırektory Myrzataı Joldasbekovtyń aıtýynsha, baıqaýǵa mektepke deıingi mekemelerden, qazaq tili oqytýshylarynan, ádisker-ǵalymdar men qoǵamdyq uıymdardan barlyǵy 20-ǵa jýyq eńbek kelip túsken.
«Tildiń kósegesin kógertemiz, qazaq tili shyn máninde memlekettik tilge ıe bolsyn desek, til úıretýdi búldirshinderden bastaýymyz kerek», - deıdi M.Joldasbekov.
Іrikteý barysynda qazylar alqasy kelip túsken jumystardyń til úıretýdegi qolaılylyǵy men ádistemelik tıimdiligine basa naraz aýdardy. Nátıjesinde, baıqaýdyń júldeli birinshi orny men 300 myń teńge kólemindegi syıaqysy pedagogıka ǵylymdarynyń kandıdaty, balalarǵa arnalǵan birneshe kitaptyń avtory Raıhan Májenqyzyna (Astana) berildi. Ekinshi oryn men 200 myń teńge mólsherindegi syıaqy pavlodarlyq №116-shy balabaqshanyń muǵalimi Áıgerim Kárimovaǵa buıyrsa, úshinshi oryn men 100 myń teńgeni Arqalyq qalasyndaǵy «Raýshan» balabaqshasynyń oqytýshysy Aldanysh Aıjaryqova ıelendi.
Memlekettik tildi damytý Prezıdenttik qory dırektorynyń mindetin atqarýshy Azat Sháýeevtyń atap kórsetýinshe, Qor qurylǵaly beri óziniń maqsat-mindetteri baǵytynda birqatar tildik jobalardy iske asyrdy jáne olar bıyl da jalǵasyn tappaq. Máselen, 2010 jyl aıtýly datalarǵa toly bolýyna oraı, aldaǵy naýryz aıynyń 1-inen bastap qazaq mektepteriniń oqýshylary arasynda Uly Jeńistiń 65 jyldyǵyna arnalǵan «Erlik pen Jeńis» jáne Qazaqstannyń EQYU-ǵa tóraǵalyq etýine arnalǵan ózge tildi mektep oqýshylary arasynda «Elim Eýropa tórinde» atty respýblıkalyq shyǵarmalar baıqaýy ótkiziledi. Úzdik shyǵarmalar «Ulan» balalar gazetinde jarııalanatyn bolady. Al jeńimpazdardy anyqtaý jáne marapattaý saltanaty aldaǵy maýsymnyń 1-i - halyqaralyq balalar kúnine belgilenip otyr.
Sondaı-aq búgingi shara barysynda qazaq tilin damytýǵa arnalǵan qoǵamdyq jobalarǵa qoldaý kórsetkeni úshin birneshe otandyq kompanııa QR Memlekettik hatshysy-Syrtqy ister mınıstri Qanat Saýdabaevtyń alǵys hattarymen marapattaldy.
