Astanada Búkilálemdik boksshylar keńesiniń konventsııasy ótedi
ASTANA. QazAqparat - Astanada halyqaralyq mamandandyrylǵan EXPO-2017 kórmesi aıasynda Búkilálemdik boksshylar keńesiniń (WBC) jyl saıynǵy 55-shi konventsııasy ótedi. WBC uıymynyń Hollıvýdta ótken (Florıda shtaty) 54-shi konventsııasyndaǵy ótinishin Qazaqstannyń kásibı boks federatsııasynyń prezıdenti Erlan Bekhojın men vıtse-prezıdent Vıktor Demıanenko sátti qorǵap shyqty.
Atalǵan sharany ótkizýge umtylys tanytqan elderdiń qatarynda Katar men OAR bar bolatyn. WBC uıymy 1963 jyly 11 boks federatsııasynyń ókilderi tarapynan quryldy. Uıymnyń shtab-páteri Meksıkanyń astanasy Mehıko qalasynda ornalasqan. Bul álemdegi eń yqpaldy boksshylar uıymy, al, WBC boks álemindegi iri oqıǵalardyń biri sanalady.
Búkilálemdik boks federatsııasynyń prezıdenti (WBC) -Maýrısıo Sýleıman. Qazaqstan konventsııalarǵa 1990 jyldardan beri qatysyp keledi jáne ol TMD kóleminde osyndaı joǵary dárejedegi bedeldi shara ótetin Reseıden keıingi ekinshi orynda turǵan memleket.
WBC konventsııasy álemniń eń bedeldi degen tulǵalaryn elimizben tanystyrýdyń tamasha múmkindigi. Osyndaı konventsııalardy uıymdastyrý jaǵynan úlken tájirıbesi bar qazaqstandyq promoýter Bolat Mankenovtyń aıtýynsha, Qazaqstanǵa kásibı bokstaǵy aty álemge tanylǵan myqty boksshylar men promoýterler, menedjerler men álemdik reıtıngtik qurylymdardyń ókilderi keledi.
Bul rette Astana konventsııasyna Evander Holıfıld, Maık Taıson jáne Gennadıı Golovkın sııaqty ataǵy jer jaryp turǵan sportshylardyń keletini týraly aıtsaq ta jetkilikti.
Taǵy aıta ketetin másele - Gennadıı Golovkınge WBC uıymynyń 54-shi konventsııasy aıasynda eń qarqyndy sportshy retinde arnaıy marapt tapsyryldy. Sonymen qatar ol orta salmaqtaǵy boksshylar arasynda qarsylastaryn eń kóp nokaýtqa túsirgen boksshy retinde Gınnestyń rekordtar kitabynyń sertıfıkatyna ıe boldy.
Osy shara kezinde Glovkınniń brıtanııalyq Kell Brýkpen kezdesýi jyl oqıǵasy retinde ataldy.
Buǵan qosa Qazaqstannyń kásibı boks federatsııasynyń prezıdenti Erlan Bekhojınniń aıtýynsha, konventsııanyń Astanada uıymdastyrylýy elde boks sportynyń keń aýqym alyp, damýyna erekshe serpin beredi.
