Astanada «Búkil álemdegi beıbitshilikke rýhanı kelisim arqyly» atty mereıtoılyq ǵylymı-praktıkalyq konferentsııa ótedi

Bul týraly búgin baspasóz máslıhatynda QR Parlamenti Senatynyń depýtaty, «Rýhanı kelisim kongresi» halyqaralyq qorynyń prezıdenti Tólegen Muhamedjanov málim etti.

«Biz elimizdegi rýhanı kelisimniń 20 jyldyq qyzmetin talqylaıtyn bolamyz. Rýhanı kelisim qazaqstan qoǵamyna jáne jalpylaı alǵanda álemdik qaýymdastyqqa ne berdi degen másele tóńireginde oı órbitemiz» , - dedi senator.

Shara úsh kúnge sozylady.  Shetelderden kóptegen belgili tulǵalar keledi dep josparlanýda.

«Biz rýhanı kelisim kúnin jyl saıyn atap ótemiz. Basty urandarymyz - senim, syılastyq, beıbitshilik jáne kelisim. Jer - ǵaryshtyń kishkentaı ǵana bólshegi. Sondyqtan biz óz órkenıetimizdi saqtap qalýǵa mindettimiz», - dedi T. Muhamedjanov.

Senatordyń aıtýynsha, elimiz rýhanı kelisim kúnin 18 qazanda atap ótpek. Dál sol kúni osydan 20 jyl buryn elimiz táýelsizdigin endi alǵan shaqta 1-shi Dúnıejúzilik rýhanı kelisim kongresin ótkizgen bolatyn. Sol kúni tarıhta tuńǵysh ret bir ústel basyna barlyq dinderdiń, dinı qoǵamdyq birlestikterdiń ókilderi, ataqty ǵalymdar, mádenıet qaıratkerleri bas qosty.

«Kongresti ótkizý ýaqyty jaıdan-jaı tańdalyp alynbady. Dál osyndaı kongresti týra 100 jyl buryn Chıkago (AQSh) qalasynda ótkizbek bolǵan, alaıda ol bastama jalǵasyn tappaı qalǵan edi», dedi T. Muhamedjanov.

Onyń aıtýynsha, Almatyda ótken kongreske Memleket basshysy Nursultan Nazarbaev qoldaý kórsetken.