Astanada buqaralyq sportty damytýdyń zamanaýı úrdisteri talqylanady
ASTANA. QazAqparat - Astanada 23-25 qazan aralyǵynda «Buqaralyq sportty damytýdyń zamanaýı úrdisteri: problemalary men sheshimder» atty halyqaralyq ǵylymı-praktıkalyq konferentsııa ótedi. Bul týraly búgin ótken baspasóz máslıhatynda QR Sport jáne dene shynyqtyrý komıtetiniń tóraǵasy Elsııar Qanaǵatov aıtty.
Sharada Qazaqstan, Belarýs, Reseı jáne Ýkraınanyń sporttyq qozǵalysyn damytý salasyndaǵy ǵylym jáne tájirıbe ókilderi bas qosady.
«Qazir, ózderińiz bilesizder, bizdiń sportshylarymyz halyqaralyq jarystarda jaqsy óner kórsetip júr. Degenmen, bolashaqta buqaralyq sportty damytpaı, búgingi jetken bıigimizden kóterile almaıtynymyz anyq», - deıdi E. Qanaǵatov
Onyń aıtýynsha, aýyldy jerlerdegi ınfraqurylym men sporttyq ǵımarattardy kóptep salý, buqaralyq sporttyń damýyna tikeleı yqpal etedi.
«Qazaqstan Prezıdenti óziniń halyqqa arnaǵan Joldaýlarynda bizdiń eń aldymen óńirlerdegi, ásirese aýyldy jerler men shaǵyn qalalardaǵy ınfraqurylymdardy damytýǵa kóńil bólýimizdi basa aıtady. Óıtkeni ol jaqtarda buqaralyq sporttyń damýy kóńil kónshiterlik jaǵdaıda dep aıta almaımyz. Erteńgi konferentsııada osy jáne basqa da máselelerdi sheshý joldaryn halyqaralyq sarapshylar men mamandar ortaǵa salatyn bolady», - deıdi komıtet tóraǵasy.
Onyń aıtýynsha, konferentsııa qorytyndysy boıynsha Qazaqstandaǵy buqaralyq sportty damytýdyń alǵysharttary ázirlenip, sarapshylardyń usynystary talqylanatyn bolady.
Sondaı-aq, atalmysh sharada buqaralyq sportty damytý joldary men ǵylymı baǵyttarynyń jańa ádistemeleri, joǵary satyly sportshylardy psıhologııalyq turǵydan daıarlaý tehnologııalaryn jetildirýde ınnovatsııalyq zerttemeler, Olımpıadalyq oıyndardyń aldynda atletterdiń shynyǵý úrdisterin uıymdastyrýdyń zamanaýı ádisteri talqylanatyn bolady.
