Astanada býhgalter kompanııa shottarynan 109 mln teńgeden astam aqsha jymqyrǵan

ASTANA. KAZINFORM — Astanada eki kompanııanyń shotynan óz esepshotyna jáne baqylaýyndaǵy jeke kásipkerlerdiń shottaryna 109 mln teńgeden astam aqsha aýdarǵan býhgalterge sot úkimi shyqty. Bul týraly Astana qalasynyń qylmystyq ister jónindegi aýdanaralyq soty málim etti.

Astanada býhgalter kompanııa shottarynan 109 mln teńgeden astam aqsha jymqyrǵan
Foto: Kazinform\JI

Sot málimetinshe, V. 2019–2023 jyldary M.-ǵa tıesili eki jaýapkershiligi shekteýli seriktestikte (JShS) býhgalter, keıin bas býhgalter bolyp jumys istegen. Qyzmet barysynda ol kompanııalardyń bank shottaryna qol jetkizip, qarjy operatsııalaryn óz betinshe júrgizý múmkindigine ıe bolǵan.

Osy múmkindikti paıdalanǵan býhgalter kompanııalardyń shottarynan óz esepshotyna jáne ózi baqylaǵan jeke kásipkerlerdiń shottaryna birneshe ret aqsha aýdarǵan. Bul aýdarymdarǵa eshqandaı sharttyq nemese zańdy negiz bolmaǵan. Sonymen qatar aqsha qozǵalysy býhgalterlik esepte kórsetilmegen.

Saldarynan eki kompanııaǵa 109 mln teńgeden astam shyǵyn kelgen. Bul qarajat jábirlenýshilerge áli qaıtarylmaǵan.

Sot V.-nyń kinásin jábirlenýshi ókiliniń jáne kýálardyń jaýaptary, saraptama qorytyndylary, zattaı dálelder men is materıaldary arqyly dáleldengen dep tanydy.

Sottalýshy óz kinásin moıyndamaı, aqtaýdy suraǵan. Al prokýror oǵan 8 jylǵa bas bostandyǵynan aıyrý jazasyn taǵaıyndaýdy jáne 10 jyl boıy memlekettik ári kommertsııalyq uıymdarda materıaldyq jaýapty qyzmet atqarý quqyǵynan aıyrýdy usynǵan.

Sot qandaı sheshim shyǵardy?

Qylmystyń aýyrlyǵyn, kompanııalarǵa keltirilgen shyǵynnyń ótelmegenin jáne sottalýshynyń eki kámeletke tolmaǵan balasy bar ekenin eskergen sot oǵan 7 jylǵa bas bostandyǵynan aıyrý jazasyn taǵaıyndady.

Buǵan qosa, sottalýshyǵa 10 jyl boıy memlekettik jáne kommertsııalyq uıymdarda materıaldyq jaýapty laýazymdardy atqarýǵa tyıym salyndy.

Alaıda onyń 2013 jáne 2014 jyly týǵan eki balasy bolǵandyqtan, sot jazany óteýdi bir jylǵa keıinge qaldyrdy. ıAǵnı bas bostandyǵynan aıyrý jazasyn oryndaý ázirge keıinge shegerildi.

Sondaı-aq sot jábirlenýshilerdiń keltirilgen shyǵyndy óndirip alý týraly talaptaryn qanaǵattandyrdy.

Sot úkimi ázirge zańdy kúshine engen joq.

Aıta keteıik, búgin BQO-da 29 mln teńge jymqyrǵan balabaqsha esepshisiniń isi sotqa joldanǵany belgili boldy.