Astanada búginde qansha abonent tabıǵı gazǵa qosylǵan
ASTANA. KAZINFORM — Astanada bıyl «Qazgorodok» turǵyn alabynda gaz jelileriniń qurylysy bastalady, al «Óndiris» turǵyn alaby 2026-2027 jyldary tolyq gazdandyrylady. Bul týraly Kazinform agenttiginiń resmı saýalyna jaýap bergen Astana qalasynyń ákimdigi habarlady.
Ákimdiktiń málimetinshe, búginde elordada «Kóktal-1», «Kóktal-2», «Agrogorodok», «Temirjolshylar», «Ónerkásip», «Ońtústik-Shyǵys», «Kúıgenjar», «Mıchýrıno», «Internatsıonalnyı», «Family Village», «Vela Village», «Úrker», «Telman», «Kirpishti», «Shubary», sondaı-aq «Aqbıdaı» men «Qazaqaýyl» turǵyn alaptarynda jáne qalanyń eski bóligindegi Potanın kóshesiniń úsh shaǵyn aýdanynda turǵyndardy tabıǵı gazǵa qosý múmkindigi qamtamasyz etilgen.
— Gazben jabdyqtaý jelileri shamamen 290 myń turǵyny bar 19,9 myń abonentke deıin jetkizildi. Gazdandyrýǵa jatatyn halyqtyń jalpy sany — 300 myń adam. Búginde 14,5 myńnan astam abonent tabıǵı gazǵa qosyldy, — delingen jaýapta.
Sondaı-aq 2027 jyly gazben jabdyqtaý jelilerin 22,3 myń abonentke deıin jetkizý josparlanyp otyr. Bıyl «QazaqGaz Aimaq» AQ ınvestıtsııalyq qarajaty esebinen «Qazgorodok» turǵyn alabynda gaz jelileriniń qurylysy bastalady. Al «Óndiris» turǵyn alabyn gazdandyrý 2026-2027 jyldary «kiltti tapsyrý» qaǵıdaty boıynsha júzege asyrylady.
Aıta keteıik, Premer-mınıstr bir aıda Qazaqstandy gazdandyrý josparyn jańartýdy tapsyrdy.
Buǵan deıin Qazaqstanda gazdandyrý deńgeıi 64,2% jetkenin jazǵanbyz.
