Astanada búginnen bastap avtobýstarǵa arnalǵan jolaqtardyń birinshi kezeńi iske qosylady
ASTANA. QazAqparat - 26 shildeden bastap Astana qalasynda qalalyq qoǵamdyq kóliktiń qozǵalysy úshin «BUS LINE» jeke bólingen jolaqtardyń birinshi kezeńi iske qosylatyn bolady, dep habarlaıdy Astana qalalyq ІІD-iniń baspasóz qyzmetinen.
«Búgingi tańda Astana qalasy ІІD Ákimshilik polıtsııa basqarmasy, «Astana LRT» JShS «SMEÝ-Almaty, Astana» JShS merdigerlik kompanııasymen birlesip qoldanystaǵy QR Jol júrisi erejesiniń talaptaryna sáıkes jol tańbalaryn qoıý jáne jol belgilerin, aqparattyq panolardy ornatý jumystaryn bastady. Birinshi kezeń mynadaı kósheler boıynsha júrgiziledi: Baýyrjan Momyshuly dańǵyly Abylaıhan dańǵylynan Saraıshyq kóshesine deıin jáne Bógenbaı batyr dańǵyly Ýálıhanov kóshesinen Saryarqa kóshesine deıin», delingen habarlamada. Astana qalasy ІІD ÁPB bastyǵynyń orynbasary polıtsııa podpolkovnıgi Eljan Shpekovtiń aıtýynsha, atalǵan jolaq basyp ozýdy jáne avtobýstyń aldyna shyǵýdy qarastyrmaıdy. Astana qalasynyń qalalyq qoǵamdyq kóliktiń qozǵalysy úshin belgilengen jolaqty iske qosý arqyly júrgizýshilerdiń tártibin arttyrady, qoǵamdyq kóliktiń jyldam júrýine yqpal etedi, bul araqashyqtyqty 30%-ǵa qysqartýǵa jáne avtobýstardyń qozǵalys kestesin saqtaýǵa múmkindik beredi. Jańa engizilim qozǵalys qaýipsizdigin joǵarylatady, jolaýshylar úshin jaıly, jol-kólik oqıǵasy sanyn tómendetedi jáne qalalyq trafıkti jeńildetedi. Jeke jolaq boıynsha júretin avtobýs júrgizýshileri men jalpy jolaq boıynsha júretin júrgizýshilerdiń tártibin ákimshilik polıtsııa qyzmetkerleri vızýaldy túrde jáne Astana qalasy ІІD JBO beınebaqylaý kameralary arqyly baqylaıtyn bolady. Shildede jáne tamyz aıynyń birinshi onkúndiginde ákimshilik polıtsııa qyzmetkerleri atalǵan ýchaskelerde QR jolda júrý erejeleriniń buzylýyna qatysty aldyn alý jumystaryn júrgizedi.
