Astanada birinshi ret qazaq-túrik taǵamdarynyń jármeńkesi ótti
ASTANA. KAZINFORM – Astanada «Taza Qazaqstan: Astana – tazalyq pen tártiptiń úlgisi» aýqymdy ekologııalyq aktsııasy ótip jatyr. Onyń aıasynda Astanada qazaq-túrik taǵamdarynyń jármeńkesi ótti. Bul týraly elorda ákimdiginiń resmı saıty jazdy.
Ekoaktsııa barysynda Baıqońyr aýdany ákimdiginiń bastamasymen alǵash ret qazaq-túrik taǵamdarynyń jármeńkesi uıymdastyryldy.
Jármeńkege túrik eliniń áıgili bórekteri, sımıtteri jáne irimshik pırogtary usynyldy. Sondaı-aq turǵyndarǵa baýyrsaq, qurt, irimshik, shaı taratyldy.
Atatúrik saıabaǵynda ótken jármeńkege Túrkııa Respýblıkasynyń Qazaqstandaǵy Tótenshe jáne Ókiletti Elshisi Mustafa Kapýchý jáne Túrkııanyń basqa da ókilderi, sondaı-aq Astana qalasy ákimdiginiń basshylyǵy, Baıqońyr aýdanynyń belsendi turǵyndary men erikti jastar qatysty.
Esterińizge sala keteıik, Astanada bul aptalyq «Kıeli meken» dep atalady. Onyń barysynda qala eskertkishteri men olardyń mańaıynda aýqymdy tazalyq jumystary júrgizilip jatyr.
«Jasyl aımaq» dep atalatyn úshinshi apta aǵash otyrǵyzý men kóshetterdi ákteýge arnalady.
4 mamyrǵa deıingi kezeń «Ónegeli urpaq» dep atalyp, ardagerlerdiń aýlalary men qarttar úıiniń aýmaqtaryn tazalaý men abattandyrýǵa arnalady.
«Móldir bulaq» dep atalatyn sońǵy, besinshi aptada sý qoımalarynyń aınalasy – ózen-kólder qoqystan tazartylady.
