Astanada «Birlik» marafonynda 3 myńnan astam adam júgirdi
ASTANA. KAZINFORM – Qazaqstan halqy Assambleıasynyń 30 jyldyǵyna oraı, elimizdiń barlyq óńirinde «Birlik júgirisi – 2025» respýblıkalyq marafony ótti. Sport merekesine el boıynsha 17 myń adam qatyssa, onyń 3 myńy elordada bas qosty, dep habarlaıdy Kazinform tilshisi.
Atalǵan shara Qazaqstandaǵy barlyq etnostardy deni saý jáne birtutas ult bolýǵa yntalandyrýdy kózdeıdi. Ásirese eresektermen birge balalardyń, qarttardyń, múgedektigi bar jandardyń da júgirýine barynsha jaǵdaı jasaldy.
Qatysýshylar tańǵy 5:30-dan bastap jınala bastady, al alǵashqy júgirister 7:00-de bastaldy. Júgirý baǵyty EKSPO aýmaǵynan bastalyp, «Báıterek» monýmentine deıin jalǵasty, odan keri qaıtyp, Túrkistan jáne Aqmeshit kósheleri arqyly ótti.
Júgiris birneshe qashyqtyqta – 1 km, 5 km, 10 jáne 21,1 shaqyrymda uıymdastyryldy, sondyqtan árbir qatysýshy ózine yńǵaıly formatty tańdaı aldy. Ásirese, 30 shaqyrymdyq komandalyq estafetaǵa (6×5 km) erekshe kóńil bólindi. Estafeta erejesine sáıkes, ár komandada keminde bir áıel adam bolýy kerek.
Júgirýge túrli jas pen ult ókilderi, kásibı sportshylardan bastap salaýatty ómir saltyn ustanatyn áýesqoılarǵa deıin barlyǵy qatysty. Pavlodar qalasynan kelgen Marına Shnaıder 50–59 jas aralyǵyndaǵy topta jeńimpaz atandy.
— Meniń jasym 52-de, júgirýmen jyldar boıy aınalysamyn. Mamandyǵymnyń sportqa qatysy joq, «Qazaqstan alıýmınııi» zaýytynda laborant-hımık bolyp jumys isteımin. Pavlodarda «Running Pavlodar» qaýymdastyǵyn qurǵanbyz, búgin 10 shaqty adam bolyp Astanaǵa keldik. Sońǵy jyldary elimizde júgirý mádenıeti damyp jatqanyn erekshe baıqaýǵa bolady jáne bul qýantady. Mysaly 5 jyl buryn mundaı belsendilik bolǵan joq. Mádenıetpen birge, ınfraqurylym da jaqsy damyp keledi, bizde Pavlodarda shańǵy bazasy men elimizdegi eń uzyn jaǵalaý bar. Adamdar júgirýshilerge jol berý kerek ekenin túsine bastady. Barshańyzdy Qazaqstan halqynyń birligi kúnimen quttyqtaımyn! Búgin osynsha kóp adamnyń, onyń ishinde balalardyń da jınalǵany – óte qýanyshty jaǵdaı. Bul naǵyz júgirý merekesi! Men Qazaqstan sııaqty kópultty ári tatý elde turatynyma maqtanamyn. Barshańyzǵa zor densaýlyq, amandyq-saýlyq jáne jaqsylyqtar tileımin, — deıdi pavlodarlyq qatysýshy.
Aıta keteıik, «Birlik júgirisi» birneshe jyl boıy uıymdastyrylyp keledi jáne etnosaralyq birlikti nyǵaıtyp, salaýatty ómir saltyn nasıhattaıtyn, qoǵamda ózara qoldaý men birlik rýhyn qalyptastyratyn jaqsy dástúrge aınaldy. Ótken jyly marafonǵa 15 óńirden 15 myń adam qatyssa, bıyl olardyń sany 17 myńǵa deıin artty.
Іs-shara Qazaqstan halqy Assambleıasynyń bastamasymen, Astana qalasynyń trıatlon federatsııasy, Týrızm jáne sport mınıstrligi, Mádenıet jáne aqparat mınıstrligi men Astana qalasy ákimdiginiń qoldaýymen uıymdastyryldy.
1 mamyr merekesiniń qurmetine búgin elordada zııatkerlik vıktorınalar men kórmelerden bastap túrli kontsertter men jarystarǵa deıin ondaǵan mádenı-sporttyq is-shara ótip jatyr.