Astanada brıtandyq ýnıversıtettiń fılıaly ashyldy
ASTANA. KAZINFORM – Elordada shetel ýnıversıtetiniń fılıaly jumysyn bastady. Bilim oshaǵyn saltanatty ashý rásimine Ǵylym jáne joǵary bilim mınıstri Saıasat Nurbek, Oqý-aǵartý mınıstri Ǵanı Beısembaev, Ulybrıtanııanyń Qazaqstandaǵy elshisi Sallı Aksvortı, sondaı-aq ýnıversıtet basshylyǵy qatysty.
Kampýs bakalavrıat baǵdarlamalary boıynsha 315 stýdent qabyldaýdy josparlap otyr. Baǵyttary: kompıýterlik ǵylym, bıznes-basqarý, azamattyq qurylys, geologııa jáne paıdaly qazbalardy barlaý. Oqytý aǵylshyn tilinde júrgiziledi.
Ýnıversıtet 1883 jyly qurylǵan, Ulybrıtanııanyń jetekshi zertteý joǵary oqý oryndary Russell Group qaýymdastyǵynyń múshesi. QS World University Rankings 2025 reıtıngisinde 186-orynda tur. JOO túlekteriniń qatarynda medıtsına salasy boıynsha Nobel syılyǵynyń laýreaty Martın Evans, saıasatker Nıl Kınnok jáne kompozıtor Karl Djenkıns bar.
Ǵylym jáne joǵary bilim mınıstrliginiń málimetine súıensek, sońǵy úsh jylda Qazaqstanda sheteldik ýnıversıtetterdiń 40 fılıaly ashyldy. Olar ıadrolyq fızıka, geologııa, bıznes-basqarý jáne kompıýterlik ǵylym salasynda mamandar daıarlap jatyr.
Ǵylym jáne joǵary bilim mınıstri Saıasat Nurbek elimizde sheteldik JOO-lardyń fılıalyn ashýdaǵy úsh mindetti atady:
— Birinshiden — Qazaqstandy akademııalyq hab retinde qalyptastyrý. Tek bıyldyń ózinde myqty ýnıversıtetterdiń esebinen bizge 31,5 myń sheteldik stýdent keldi;
— Ekinshi mindet — aımaqtyq ýnıversıtetterdi zertteý ýnıversıtetterine transformatsııalaý;
— Úshinshi mindet — tehnologııalar transferin damytý.
Sondaı-aq vedomstvo basshysy birqatar birlesken joba júzege asyrylyp jatqanyn qosty. Atap aıtqanda, Arızona ýnıversıteti men M. Qozybaev atyndaǵy Soltústik Qazaqstan ýnıversıteti Atyraýda kúkirtti polımerler men optıkalyq materıaldarǵa qaıta óńdeý boıynsha birlesken zertteýler júrgizip jatyr.
— Endi talanttardy joǵaltpaı, myqty stýdentterdiń bir bóligin osynda qaldyryp, olarǵa álemdik deńgeıdegi bilim berý múmkindigi bar, — dedi Saıasat Nurbek.
Aıta ketsek, Qazaqstan sheteldik JOO fılıaldarynda oqýǵa granttar bóledi. Mınıstrdiń aıtýynsha, barlyǵy 3000 grant bólingen, onyń ishinde 300 grant — Ulybrıtanııa ýnıversıtetine buıyrdy.
Buǵan deıin Qazaqstanda sheteldik JOO fılıaldaryna qalaı túsýge bolatyny týraly jazǵan edik.
Bıyl elimizde sheteldik tanymal ýnıversıtetterdiń fılıaldary qaı qalalarda ashylatyny jaıly da jazǵan edik.