Astanada birden eki jańa ýchaskelik polıtsııa pýnkti ashyldy
ASTANA. KAZINFORM — Quqyq qorǵaý qyzmetteriniń qoljetimdiligin arttyrý jáne «halyq únine qulaq asatyn memleket» qaǵıdatyn iske asyrý maqsatynda Nura jáne Almaty aýdandarynda eki ýchaskelik polıtsııa pýnkti paıdalanýǵa berildi.
QR Іshki ister mınıstrligi baspasóz qyzmetiniń málimetinshe, № 53 ýchaskelik polıtsııa pýnkti Nura aýdanynda Qaıym Muhamedhanov kóshesi, 23 mekenjaıynda, «Anisa» turǵyn úı kesheniniń birinshi qabatynda ornalasqan. Jalpy aýmaǵy — 129 sharshy metr. Pýnktte 5 qyzmettik kabınet qarastyrylǵan.
Ashylý saltanatyna aýdan ákiminiń orynbasary Álııa Ábsemetova, sondaı-aq máslıhat depýtaty Nurlan Múslim qatysty.
Ekinshi № 8 ýchaskelik polıtsııa pýnkti Almaty aýdanynda Táýelsizdik dańǵyly, 40 mekenjaıynda, «Baıtas» turǵyn úı kesheninde ornalasqan. Pýnkttiń aýmaǵy — 53,4 sharshy metr, 3 qyzmettik kabınet qarastyrylǵan. Іs-sharaǵa Almaty aýdanynyń ákimi Rústem Táýekelov qatysty.
Árbir ýchaskelik polıtsııa pýnkti polıtsııa qyzmetkerleriniń jaıly ári tıimdi jumys isteýi úshin qajetti barlyq jabdyqpen qamtamasyz etilgen. Beınetirkegishter men qyzmettik avtokólikter bólingen. Qyzmet kórsetiletin aýmaqtarda dıplomatııalyq ókildikterden bastap, balabaqshalar men bilim berý mekemelerine deıin mańyzdy nysandar ornalasqan.
— Jańa ýchaskelik polıtsııa pýnktteriniń ashylýy — «halyq únine qulaq asatyn memleket» qaǵıdatyn júzege asyrýdaǵy jáne «Zań men tártip» tujyrymdamasyn nyǵaıtýdaǵy mańyzdy qadam. Bizdiń mindetimiz — halyqqa jaqyn bolý, azamattardyń ótinishterine jedel áreket etý jáne qalanyń árbir ýchaskesinde qaýipsizdikti qamtamasyz etý. Jańa ÝPP-lar turǵyndardyń senim deńgeıin arttyryp, profılaktıkalyq jumystyń tıimdiligin kúsheıtedi dep senemin, — dedi Astana qalasy polıtsııa departamentiniń bastyǵy Marat Tólebaev.
Osyǵan deıin elorda polıtsııasy 10 dron keshenin 83,5 mln teńgege jalǵa almaqshy ekenin jazǵan edik.