Astanada bir túnde 44 myń tekshe metr qar shyǵaryldy

ASTANA. KAZINFORM - Elordada qar tazalaýǵa tańerteń 2,4 myńnan astam jol jumysshysy jumyldyryldy. Jumys táýlik boıy jalǵasyp jatyr. Bul týraly Astana ákimdiginiń resmı saıty jazdy. 

14 aqpan kúni tańerteń qala boıynsha qar tazalaý jumystaryna 2,4 myńnan astam jol jumysshysy jáne 1,6 myńǵa jýyq arnaıy tehnıka jumyldyryldy.

13 aqpannan 14 aqpanǵa qaraǵan túni kóshelerden 44 myń tekshe metr, ıaǵnı, 3 myńǵa jýyq aýyr júk kóligine teń qar shyǵaryldy.

Aıta ketsek, qys basynan beri qala syrtyndaǵy qar polıgondaryna 331 myń reıs, 4,5 mln tekshe metrden astam qar shyǵaryldy.

Qala turǵyndarynyń qaýipsizdigi úshin joldarǵa, trotýarlar men kóshelerge qum-tuz qospasy sebiledi. 

«Qazgıdromet» sınoptıkteriniń málimetinshe, 14 aqpanda elordada kún bultty, keıde jańbyr aralas qar jaýyp, boran soǵyp, kóktaıǵaq bolady. Soltústik-batysqa aýysatyn ońtústik-batys jel ekpini 9-14, 15-20, túnde 23 m/s bolady. Aýa temperatýrasy túnde -8-10 aıaz bolsa, kúndiz 0-2 gradýsqa tómendeıdi.

Bir kúnnen keıin anda-sanda qar jaýyp, boran bolady dep kútilýde. Soltústik-shyǵys jel ekpini – 9-14, 15-20 m/s. Aýa temperatýrasy túnde jáne kúndiz -17-19-dy kórsetip, odan ári de tómendeýi yqtımal.

16 aqpan kún bultty, jaýyn-shashynsyz aýa raıy bolady dep boljanýda. Soltústik-batys jel ekpini 9-14 m/s. Aýa temperatýrasy túnde -33-35, kúndiz -27-29 aıaz.