Astanada bir páterge tirkeletin turǵynnyń sany baspananyń sharshy metrine qaraı belgilenedi

ASTANA. KAZINFORM – Májiliste zańnamaǵa astanany jáne respýblıkalyq mańyzy bar qalalardy damytý baǵytyndaǵy ózgeristeri engizýge arnalǵan zań jobasy birinshi oqylymda talqylanyp jatyr. 

Qujatty tanystyrǵan Premer-mınıstrdiń orynbasary — Ulttyq ekonomıka mınıstri Serik Jumanǵarın iri qalalarda bir páterge júzdegen adamdy tirkeý azaımaı turǵanyn aıtty. 

— Zań jobasynyń úshinshi baǵyty kóshi-qon protsesterin retteýdi kózdeıdi. Qazirgi tańda halyq iri qalalarda ómir súrýge talpynyp jatyr, bul páterlerde turǵyndardyń sanyn shekteýsiz tirkeý problemasyna alyp keldi. Tájirıbe kórsetkendeı, turǵyn úı ıeleri úıinde naqty turmaıtyn júzdegen azamatty tirkeý faktileri bar, — dedi ol.

Osy máseleni sheshý úshin zańnamaǵa mynandaı normalar engizilmekshi:

— elorda aýmaǵynda turaqty jáne ýaqytsha turatyn jeri boıynsha tirkeý normatıvin bekitý (Ol úshin jergilikti máslıhatqa bir azamatqa qansha sharshy metr tıesili ekeni belgileıtin fýnktsııa berilmek); 
— astana aýmaǵynda bir mekenjaıda normatıvterden artyq tirkeýge tyıym salý.

— Bul rette tirkeý normatıvteri turǵyn úıdiń menshik ıesiniń jáne jubaıynyń jaqyn týystaryna qoldanylmaıtynyn atap ótemiz. Sondaı-aq, Ákimshilik quqyq buzýshylyq týraly kodeksine ózgerister men tolyqtyrýlar engizý aıasynda turǵyn úılerde tirkelgen jáne turmaıtyn jeke tulǵalardy tirkeýden shyǵarmaǵany úshin turǵyn úı ıesine jaýapkershilik kúsheıtiletin bolady, — dedi vıtse-premer.

Aıta ketelik aqshaǵa úıine tirkeýge qoıatyndar jaýapkershilikke tartylatyny týraly jazǵan edik.