Astanada bir oqýshyny tamaqtandyrý 584 teńge: baǵany ósirýge ne kedergi

Astana qalasynyń bilim basqarmasy basshysynyń orynbasary Serik Ádilbekov elordalyq oqýshylardy tamaqtandyrý aınalasyndaǵy máselege qatysty túsinik berdi, dep habarlaıdy Kazinform.

«Astana qalasynyń bilim basqarmasy men ákimdigi jyl saıyn somany kóteredi. Bul soma 440 teńge boldy, 2023 jyldyń qańtarynda soma 30%-ǵa kóterilip, 584 teńgeni qurady. Biz azyq-túliktiń qymbattaýyn eskeremiz, tıisinshe bul baǵytta jumys júrip jatyr. Búgingi tańda tarıf bir balaǵa 584 teńgeni quraıdy. Bizdiń josparymyzda jańa mázir ázirleý máselesi tur, tıisinshe jańa baǵa bolady. Ázirlengennen keıin biz máslıhatta normatıvtik-quqyqtyq qujattarmen bekitemiz. Sodan keıin jańa mázir men jańa baǵa boıynsha jumys isteıtin bolamyz. Osy kúzde tarıf ózgerissiz qalady. Eger ázirleý, naqtylaý jáne kelisý protsesteri sátti bolsa, kelesi jyldan bastap ózgerister engizýdi josparlap otyrmyz», - dedi Serik Ádilbekov qalalyq kásipkerler palatasy alańynda ótken jıynda.

Bilim basqarmasy basshysynyń orynbasary ázirge baǵany kóterýge qatysty naqty aqparat berýge erte ekenin eskertti.

«Qazir qosymsha qun salyǵyn eskere otyryp tamaqtaný boıynsha eki nusqa ázirlenýde. Biz únemi qosymsha nusqalar ázirleımiz. Óıtkeni qosymsha qun salyǵy jáne qosymsha qun salyǵynsyz jumys isteıtin uıymdar bar. Jańa perspektıvalyq mázirdi ázirleý kezinde sala mamandar tartylady. Onyń ishinde Astana medıtsına ýnıversıteti jáne qalalyq mektepterdegi tamaq jetkizýshiler qaýymdastyǵynyń ókilderi bolady. Odan bólek kásipkerlerdiń de pikiri eskeriledi. Jańa mázirdi ázirleý kezinde taǵamnyń kalorııasy, vıtamın, kólem jáne óndiris tehnologııasy boıynsha belgili bir talaptar bar. Biz mázirdi ázirleý kezinde sol kezdegi baǵany, statıstıkany esepke alamyz. Búginde astyń quramy boıynsha sheshim qabyldandy endi baǵany anyqtaý boıynsha jumys júrgizilip jatyr», - deıdi ol.