Astanada «Bir aýyl — bir ónim» respýblıkalyq kórmesi ashyldy
ASTANA. KAZINFORM — Astanada «Bir aýyl — bir ónim» (BABÓ) jobasy boıynsha respýblıkalyq kórmeniń resmı ashylý saltanaty ótti. Bul bastama aýyldyq jerlerdegi shaǵyn jáne mıkrobızneske qoldaý kórsetýge jáne ony damytýǵa baǵyttalǵan.
Joba Japonııa halyqaralyq yntymaqtastyq agenttiginiń (JICA) qoldaýymen, «Atameken» Ulttyq kásipkerler palatasy jáne Ulttyq ekonomıka mınıstrliginiń birlesýimen júzege asyrylyp jatyr.
Bıyl kórmege Qazaqstannyń 20 óńirinen 50 otandyq óndirýshi qatysyp otyr. Kórme stendterinde tabıǵı azyq-túlik ónimderi, qolóner buıymdary, tekstıl, kosmetıka jáne aýyl sharýashylyǵy úshin ınnovatsııalyq bastamalar kórsetildi.
Saltanatty ashylý rásiminde Ulttyq ekonomıka vıtse-mınıstri Erlan Saǵynaev quttyqtaý sóz sóılep, óńirlerdiń turaqty damýy úshin jobanyń mańyzdylyǵyn atap ótti.
— Búgin «Bir aýyl — bir ónim» jobasynyń jyl saıynǵy respýblıkalyq kórmesiniń ashylý saltanatynda sizdermen júzdesip otyrǵanyma qýanyshtymyn! «Bir aýyl — bir ónim» jobasynyń negizgi maqsaty jergilikti resýrstardan biregeı ónimder shyǵaryp, olardy ishki jáne syrtqy naryqtarǵa ilgeriletý. Fınalısterdiń iriktelgen ónimderi taýar belgilerin, sapa standarttaryn, sertıfıkattaýdy ázirleý, ótkizý naryqtaryn izdeý boıynsha súıemeldeýden ótedi. Bul jobany júzege asyrýdaǵy birlesken kúsh-jigerimiz mańyzdy nátıjelerge qol jetkizýge jáne óńirlerimizdiń órkendeýine óz úlesin tıgizetinine senimdimin. Kórmege qatysýshylarǵa jemisti jumys tileımin — dedi Erlan Saǵynaev.
Sonymen qatar, «Atameken» Ulttyq kásipkerler palatasy basqarma tóraǵasynyń orynbasary Gúlnar Bıjanova fınalıster men joba qatysýshylaryn quttyqtap, qazaqstandyq ónimniń sapasy men áleýetiniń ósý qarqynyn atap ótti.
— «Atameken» úshin BABÓ jobasy — tek konkýrs nemese kórme emes, shynaıy kásipkerlik mektebi. Biz jyl saıyn ónim sapasynyń ósip, taýar assortımentiniń keńeıip, oram men marketıng deńgeıiniń kóterilip kele jatqanyn kórip otyrmyz. Ár brend eńbek, bilim jáne óz isine degen mahabbat arqyly jasalady. Bizdiń mindetimiz — osy kásipkerlerge jańa naryqtarǵa shyǵýǵa kómektesý jáne olardy ulttyq ekonomıkanyń turaqty oıynshylaryna aınaldyrý. Fınalıster men kórmege qattysýshylardy shyn júrekten quttyqtaımyn! Sizderge ári qaraıǵy tabys, órkendeý jáne kiristerdiń turaqty ósimin tileımin. Eńbekterińiz tek moıyndaýǵa ǵana emes, sonymen qatar turaqty ekonomıkalyq nátıjege ákelsin, — dedi Gúlnar Bıjanova.
Japon tarapynyń úlesi týraly Japonııa halyqaralyq yntymaqtastyq agenttiginiń (JICA) ókili Makıko Ýehara aıtyp berdi. Ol jobanyń aıtarlyqtaı nátıjelerin atap ótti: jańa brendter paıda bolyp, eksporttyq áleýet ósip jatyr, al óńir turǵyndary ózin-ózi qalyptastyrý jáne turaqty damý úshin jańa múmkindikterge ıe bolyp otyr.
Kórme qala turǵyndary men qonaqtarynyń úlken qyzyǵýshylyǵyn týdyrdy. Olar ónimderdiń dámin tatyp, unatqanyn satyp ta aldy, sondaı-aq óndirýshilermen jeke áńgimelesý múmkindigine ıe boldy.
— Maǵan kórme atmosferasy óte unady, óte qyzyq, tabıǵı jáne naǵyz qazaqstandyq ónimder! Óndirýshiler bárin júregimen jáne asqan sheberlikpen jasaıtyny kórinip tur. Keıbir taýarlardy birinshi ret kórdim, onyń bári bizdiń óńirlerde jasalatynyn bilgenime qýanyshtymyn. Mundaı ónimder el boıynsha dúken sórelerinde jıi kórinse deımin, — dedi kórmege arnaıy kelgen qala turǵyny.
Aıta ketsek, kórmeniń ashylý saltanaty men ondaǵy negizgi oqıǵalar TikTok platformasynda tikeleı efırde kórsetildi. Bul astanalyq turǵyndarǵa jáne búkil el boıynsha qoldanýshylarǵa fınalısterdiń ónimderimen tanysýǵa, taýarlardy jaqynyraq kórýge jáne óńirlerdiń biregeı brendteri jaıynda aqparat alýǵa múmkindik berdi. Onlaın-translıatsııa qazaqstandyq jergilikti ónimderdi ilgeriletý, jobanyń aýdıtorııasyn keńeıtý jáne bastamanyń tanymaldyǵyn arttyrý úshin qosymsha múmkindik boldy.
«Bir aýyl — bir ónim» jobasy Qazaqstanda 2023 jyldan beri Japon tarapynyń qoldaýymen aýqymdy túrde júzege asyrylyp jatyr. Joba aýyldyq óndirýshilerdiń óz brendterin damytýǵa, jańa jumys oryndaryn qurýǵa jáne óńirlerdiń ekonomıkasyn nyǵaıtýǵa kómektesti.
Búginde BABÓ — tájirıbe almasý, oqytý, jergilikti ónimdi ilgeriletý jáne Qazaqstannyń eksporttyq áleýetin keńeıtý platformasy. Joba óńirlik brendterdiń damýyna jáne aýyldyq aýmaqtardyń áleýetin nyǵaıtýǵa úles qosyp otyr.