Astanada bir apta ishinde taekvondodan eki halyqaralyq týrnır ótedi
ASTANA. KAZINFORM – Elordada maýsym aıynyń sońynda Dúnıejúzilik taekvondo federatsııasynyń kúntizbesine engen eki iri halyqaralyq jarys uıymdastyrylady.
22-23 maýsym kúnderi Astanada Altaı taekvondo odaǵynyń tuńǵysh chempıonaty – Altaic Taekwondo Championships ótse, 25-27 maýsym aralyǵynda dástúrli Kazakhstan Open halyqaralyq reıtıngtik týrnıri ótedi.
Qos jarys Jaqsylyq Úshkempirov atyndaǵy Jekpe-jek saraıynda uıymdastyrylady.
Altaı taekvondo odaǵynyń alǵashqy chempıonaty eresekter men jasóspirimder arasynda ótedi. G-1 sanatyndaǵy jarysta sportshylar álemdik reıtıngke qajetti upaılardy sarapqa salady.
«Altaı taekvondo odaǵy 2025 jyly Qytaıdyń Ýsı qalasynda ótken álem chempıonaty kezinde quryldy. Uıymǵa Altaı óńirine kiretin on eldiń ulttyq federatsııalary birikti. Onyń basty maqsaty – halyqaralyq yntymaqtastyqty damytý, tájirıbe almasý jáne birlesken jarystar ótkizý. Qatysýshylardyń biraýyzdan qabyldaǵan sheshimimen uıymnyń alǵashqy prezıdenti bolyp Qazaqstan taekvondo federatsııasynyń basshysy Kýdrat Shamıev saılandy», – dep habarlady federatsııanyń baspasóz qyzmeti.
Al 25-27 maýsym aralyǵynda ótetin Kazakhstan Open týrnırine álemniń 27 elinen 1106 sportshy qatysady dep kútilip otyr.
Olardyń qatarynda Armenııa, AQSh, Ázerbaıjan, Bahreın, Belarýs, Kanada, Úndistan, Iran, Iordanııa, Qytaı, Ońtústik Koreıa, Reseı, Saýd Arabııasy, Túrkııa, BAÁ, Ózbekstan jáne basqa da elderdiń sportshylary bar.
Kazakhstan Open týrnıri Dúnıejúzilik taekvondo federatsııasynyń resmı jarystar tizimine engen. Jeńimpazdarǵa álemdik reıtıngtiń 10 upaıy, kúmis júldegerlerge 6 upaı, al qola júldegerlerge 3,6 upaı beriledi.
Sondaı-aq Astanaǵa Dúnıejúzilik taekvondo federatsııasynyń prezıdenti Chýngvon Cho men halyqaralyq uıymdardyń ókilderi keledi dep josparlanyp otyr.
Aıta keteıik, Qazaqstan 2026 jyly 20-ǵa jýyq halyqaralyq jarysty qabyldaıdy.
