Astanada bozbala abaısyzda óz qolyn atyp alǵan
ASTANA. QazAqparat - Búgin túngi saǵat 02.00 shamasynda úıinde baıqaýsyzda óz alaqanyn jaralap alǵan 1997 jylǵy G. esimdi azamat aýrýhanaǵa jetkizilip, medıtsınalyq járdemnen keıin keri qaıtaryldy. Oqıǵa ornynan «Osa Lazer» markaly travmatıkalyq tapansha tárkilendi.
Bul týraly Astana qalasy ІІD baspasóz qyzmeti habarlady.
Anyq bolǵandaı, jábirlenýshiniń 20 jastaǵy aǵasy atalmysh travmatıkalyq tapanshany úsh jyl buryn beıtanys tulǵadan satyp alǵan.
Atalǵan fakt boıynsha QR QK 287 baby (qarýdy zańsyz satyp alý, saqtaý, tasymaldaý nemese alyp júrý) boıynsha sotqa deıingi tergeý bastaldy. Tergeý amaldary júrgizilýde. Qajetti saraptamalar taǵaıyndalǵan.
Eske salsaq, 2015 jyldyń 1 qańtarynan bastap Qazaqstan Respýblıkasynda travmatıkalyq qarýdy erikti jáne aqyly túrde tapsyrý aktsııasy jyldyń aıaǵyna deıin júrgiziledi. Búgingi tańda elorda turǵyndarynan travmatıkalyq qarýdy erikti túrde tapsyrý jóninde 2022 ótinish kelip tústi.
2015 jyldyń 1 qańtarynan qazirgi ýaqytqa deıin 2163 travmatıkalyq qarý birligi, sonyń ishinde sholaq qarýdyń 845 birligi men travmatıkalyq gazdy qarýdyń 1318 birligi tapsyryldy.
