Astanada boıjetkendi qutqarǵan turǵyn marapattaldy
ASTANA. QazAqparat - Astana qalasynyń tótenshe jaǵdaılar departamentinde elorda turǵyny Rasýl Baıtelenovqa Aqerke Jıenhandy qutqaryp, erlik jasaǵany úshin alǵys hat pen estelik syılyq tabystaldy.
Qala ákimdiginiń resmı saıtynyń habarlaýynsha, Ilınka kentinde sýda shomylyp júrgen baıjetken sýǵa bata bastaǵan. Ony sý mańynda jubaıymen demalyp júrgen Rasýl baıqaǵan.
TJD basshysy azamattyq qorǵanys polkovnıgi Barat Duzaqbaev oǵan batyldyǵy jáne adam ómirin qutqarǵany, sondaı-aq belsendi azamattyq pozıtsııasy úshin alǵys aıtty.
- Bul kez kelgen adamnyń qolynan kele bermeıdi. Osy erligińiz barshaǵa úlgi bolady. Mundaı ákeniń balalary da eliniń eleýli azamaty bolatynyna senimdimiz, otbasyńyzǵa saýlyq tileımiz, - dedi Barat Duzaqbaev.
Rasýldyń aıtynsha bul oqıǵa 9 tamyzda saǵat 17.00 kezinde oryn alǵan.
- Biz endi ǵana kelip, jaıǵasqan edik. Sýǵa túskende jaǵadan 10-15 metr jerde batyp bara jatqan qyzdy baıqadym. Ne bolǵanyn birden túsine qoımadym. Ol aıǵaılap, kómekke shaqyrǵan joq. Erip kelgen qurbysynyń da esi ketip, úndemeı turdy. Men dereý kómekke bardym, - deıdi Rasýl.
Qyzdar bul jerge shomylýǵa alǵash ret kelgen eken. Sý kúrt tereńdep ketkendikten, olardyń biri sýǵa bata bastaǵan. Aqerke nashar júzedi. Qutqarýshynyń aıtýynsha, ózi de asa júze qoımaıdy, adam qutqaratyndaı mashyqtary da joq, biraq qyzdy jaǵaǵa shyǵarýǵa shamasy jetkenine qýanyshty.
- Shynymdy aıtsam, men erlik jasaǵan joqpyn dep oılamaımyn. Menińshe, bul bizdiń azamattyq jaýapkershiligimiz, mundaı jaǵdaıda árbir azamat kómektesýge tıis. Sýǵa batyp bara jatqan qyzdy kórgende esh oılanbastan ony qutqarmaq boldym, deıdi Rasýl.
Ol otbasymen birge Ilınkanyń janyndaǵy sý qoımasyna nemese Qarajarǵa jıi kelip turady, keıde Býrabaıǵa da barady.
Rasýl mamandyǵy boıynsha advokat, 2008 jylǵa deıin quqyq qorǵaý organdarynda jumys istegen, qazirgi kezde Astana qalasynyń advokattar alqasynda qyzmet etedi.
Álisher men Rústem degen uldary fýtbolǵa áýes, olar óz ákelerin maqtan tutady. Bolashaqta sol sııaqty bolǵylary keledi. Balalar trenajerlarda kúnde jattyǵady.
Baıtelenovtar áýleti salaýatty ómir saltyna kóp kóńil bóledi. Úıde erli-zaıyptylar mektepte ótken sporttyq jarysta jeńip alǵan kýbok pen olımpıada chempıony Ilıa Ilınmen birge túsken sýret te bar. 
