Astanada boıjetkendi buzaqydan qutqarǵan ofıtser marapattaldy
ASTANA. QazAqparat - Búgin Ulttyq gvardııanyń bas qolbasshylyǵynda uryny izin sýytpaı ustaǵan ofıtser Tımýr Rahymovqa qurmet kórsetildi, dep habarlaıdy QazAqparat Ulttyq gvardııanyń baspasóz qyzmetine silteme jasap.
Bolǵan oqıǵa týraly T.Rahymov QazAqparat tilshisine aıtyp berdi: «Alǵashynda qyz ben jigit arasyndaǵy qarapaıym kıkiljiń dep oıladym. Biraq julysa bastaǵan ekeýin kórip, jigittiń pıǵyly nashar ekenin ańǵardym. Aıǵaı salyp edim, jigit qasha jóneldi. «Toqta» degenime qaramady, bir shaqyrymdaı artynan qýýǵa týra keldi. Qalyń jaýǵan qardyń ústimen oǵan jetip alyp, qozǵaltpaı kúzetip otyrdym. Onyń qolynda pyshaq nemese tapansha bolýy múmkin dep oıladym».
Saltanatty sharada qylmyskerdi ustaýda qyraǵylyq, batyldyq pen tabandylyq tanytqany úshin maıor Rahymov Tımýr QR Ulttyq gvardııasynyń Bas qolbasshysynyń buıryǵymen «Quqyq qorǵaý áskerine - 25 jyl» medalimen marapattaldy.
Zardap shekken qyzdyń aǵasy Marat Kósherbaı sóz sóılep, ofıtserge alǵys bildirdi.
Gvardııa sardary óziniń áreketin asqan erlik dep sanamaıdy, onyń ornynda bolǵan árbir áskerı qyzmetshi nemese er azamat osyndaı qadamǵa barady dep esepteıtindigin aıtty.
«Bir sekýnd ta oılanǵan joqpyn. Biz halyqqa qyzmet etemiz. Eldi qorǵaý - árbir áskerı qyzmetshiniń paryzy. Ulttyq ulannyń áskerı qyzmetshisinde bul jaýapkershiliktiń júgi eki ese aýyr. Meniń bul áreketim ózge de áskerılerge úlgi bolar degen senimdemin», - dedi ol.
Tımýr Rahymov elordalyq áskerı bólimniń tárbıe jáne áleýmettik-quqyqtyq jumys boıynsha komandıriniń orynbasary bolyp qyzmet etedi. Qurmet kórsetý sharasyna ol jubaıymen jáne qos ulymen keldi.
