Astanada bótenniń múlkin búldirgen 143 adam jaýapkershilikke tartyldy
ASTANA. KAZINFORM — Astana qalasynyń ákimi Jeńis Qasymbek vandalızm jaǵdaılaryna baılanysty úndeý jasady, dep habarlaıdy elorda ákimdiginiń resmı saıty.
— Kún saıyn turǵyndarmen birge qalamyzdy jaıly, taza ári kórikti etý jolynda eńbek etip kelemiz. Alaıda, ókinishtisi, vandalızm faktileri men qoǵamdyq keńistikterge nemquraıly qaraıtyn jaǵdaılar da kezdesedi. Keıbir azamattar aıaldama pavılondaryn, qoqys jáshikterin, oryndyqtardy, músinderdi, abattandyrý elementterin jáne basqa da nysandardy búldirip ketedi. Olardyń arasynda kámeletke tolmaǵandar da bar, — dep jazdy qala ákimi.
Jeńis Qasymbek Memleket basshysynyń sózin tilge tıek etip, quqyqbuzýshylar óz isimen turǵyndar men qonaqtarǵa qolaısyzdyq týǵyzatynyn atap ótti.
— Mynany eskergen jón: qoǵamdyq múlikke degen kózqaras adamnyń jeke mádenıeti men tárbıesiniń kórsetkishi. Qalada jasalyp, abattandyrylyp jatqan istiń bári, eń aldymen, turǵyndarǵa qolaıly jaǵdaı jasaý úshin qolǵa alynady. Qaladaǵy ınfraqurylymdy búldirý arqyly quqyq buzýshylar qalaǵa ǵana zııan keltirip qoımaı, elorda turǵyndary men qonaqtaryna da qolaısyzdyq týǵyzady. Olardyń arasynda osy kóshelermen kún saıyn júretin týǵan-týystary men jaqyndary da bar, — dedi Jeńis Qasymbek.
Qala ákimi bótenniń jáne kommýnaldyq múlikti búldirgeni nemese joıǵany úshin 143 adam jaýapqa tartylǵanyn aıtty. Sondaı-aq qoǵamdyq oryndardy lastaý boıynsha 928 ákimshilik quqyq buzýshylyq tirkeldi.
— Quqyqbuzýshylardyń esirtki zattaryn jarnamalaý úshin salǵan graffıtılerdi joıý boıynsha da belsendi jumys júrip jatyr. Polıtsııa qyzmetkerleri kún saıyn kóshelerdi patrýldep, quqyqbuzýshylardy anyqtaıdy. Qaladaǵy beınebaqylaý kameralarynyń sanyn jyl saıyn arttyryp kelemiz. Eń bastysy, árbir quqyqbuzýshylyqtyń zańǵa sáıkes jaýapsyz qalmaıtynyn túsingen jón. Qoǵamda zań buzýshylyqqa nóldik tózimdilik ornyǵyp, oǵan jol bermeý mádenıeti qalyptasýy tıis, — dep jazdy qala ákimi.
Jeńis Qasymbek jaýapkershilikten eresek te, bala da ońaı qutylmasyn eske salyp, qalanyń kórkeıýine uqyptylyq tanytýǵa shaqyrdy.
— Zańǵa sáıkes qoǵamdyq tártipke qaıshy áreket jasaǵandarǵa qatań sharalar qoldanylyp, qajet bolǵan jaǵdaıda qylmystyq jaýapkershilik qarastyrylady. Al kámeletke tolmaǵandardyń quqyqbuzýshylyq jasaǵany úshin olardyń ata-analary zań aıasynda jaýap beredi. Elorda turǵyndary men qonaqtaryn ortaq qalamyzǵa uqyptylyq tanytyp, onyń tazalyǵy men kórkeıýine jaýapkershilikpen qaraýǵa shaqyramyn, — dep jazdy Jeńis Qasymbek.
Aıta keteıik, buǵan deıin Astananyń ózgerisin turǵyndar qalaı baǵalaıtyny týraly jazǵan bolatynbyz.
