Astanada bos jumys oryndarynyń jármeńkesi ótti
ASTANA. KAZINFORM — Elordada Jastar saıasaty máseleleri basqarmasy, «Astana jastary» ortalyǵy, «Eńbek mobıldiligi» ortalyǵy jáne L.N.Gýmılev atyndaǵy Eýrazııa ulttyq ýnıversıteti birlesip, jumys izdep júrgen tulǵalar, elordalyq JOO túlekteri jáne elorda jastary úshin bos jumys oryndar jármeńkesin ótkizdi. Bul týraly Astana qalasynyń ákimdigi málim etti.
Jármeńke barysynda júzge jýyq jumys berýshi óz kompanııalarynyń tanystyrylymyn ótkizip, bos vakansııalaryn usynyp, ózderine degen eń qolaıly kandıdattardyń bazasyn qalyptastyrady. Jumys izdeýshiler óz kezeginde kompanııalardyń HR-menedjerlerimen tildesip, qyzyqtyrǵan suraqtaryn qoıdy.
– Men – týrızm mamandyǵy boıynsha 2 kýrs stýdentimin. Bıyl Túrkııaǵa ýnıversıtet arqyly baryp, maýsymdyq jumys istep qaıttym. Sol tájirıbe barysynda jalaqynyń da, qyzmetkerlerge degen qarym-qatynastyń da joǵary deńgeıde ekenin kórdik. Bul maǵan úlken mektep boldy, týrıstik qyzmet kórsetý mádenıetin túsinýime múmkindik berdi. Sonymen qatar shetelde jumys isteı júrip, óz elimizde de týrızm salasyn damytýǵa úles qosqym keletinin anyq sezindim. Eń bastysy, óz mamandyǵym boıynsha jumys istep, kásibı tájirıbe jınaqtaýǵa árqashan daıynmyn. Sol sebepti qazirgi ýaqytta túrli vakansııalardy qarap, ózime laıyq jumys ornyn izdep júrmin, – deıdi EUÝ stýdenti Gúlnur Emýtbaeva.
Aıta keteıik, Bos jumys oryndary jármeńkesiniń negizgi maqsaty – jumys berýshi men jumys izdeýshi arasyndaǵy tikeleı baılanys arqyly jumyssyz azamattardy, bilim berý uıymdarynyń túlekteri men jastardy jumysqa ornalastyrýǵa járdemdesý.
Aıta keteıik, jyl basynan beri 700 myńnan astam qazaqstandyq jumysqa ornalastyryldy.