Astanada bos jumys oryndaryna arnalǵan kezekti jármeńke ótedi
ASTANA. KAZINFORM – Elordada bos jumys oryndaryna arnalǵan kezekti jármeńke 6 aqpan kúni ótedi, dep habarlaıdy elorda ákimdiginiń resmı saıty.
Jármeńkeni Astananyń Jastar saıasaty máseleleri basqarmasy, «Astana jastary» jastar resýrstyq ortalyǵy, Eńbek mobıldiligi ortalyǵy jáne Saryarqa aýdanynyń ákimdigi birlese uıymdastyrady.
Jumys izdeýshilerge arnalǵan is-shara 6 aqpanda saǵat 11:00-de «Turan Astana» ýnıversıtetinde ótedi.
Jármeńkeniń negizgi maqsaty – jumyssyz azamattar, bilim berý uıymdarynyń túlekteri jáne jastardyń jumysqa ornalasýyna qoldaý kórsetý, ıaǵnı jumys berýshi men úmitker arasyndaǵy tikeleı baılanys arqyly kómek kórsetý.
Atalǵan is-shara barysynda jumys berýshiler kompanııalaryn tanystyrady, bos jumys oryndaryn usynady jáne ózderine eń qolaıly kandıdattardyń bazasyn qalyptastyrady. Al úmitkerler HR-menedjerlermen sóılesip, suhbattasýdan ótip, qyzyqtyrǵan suraqtaryn qoıa alady.
Buǵan deıin elordada Ulttyq ulannyń bastamasymen «Cyber sarbaz» synyby ashylǵanyn jazǵan edik.