Astanada boranǵa baılanysty barlyq qyzmet túri kúsheıtilgen rejımge kóshti
ASTANA. KAZINFORM – Elordada boran men qatty jelge baılanysty qalanyń barlyq qyzmeti kúsheıtilgen rejımde jumys istep jatyr.
Búgin Astanada aýa raıynyń qolaısyzdyǵyna baılanysty ekinshi aýysymda mektep oqýshylary sabaqty onlaın oqydy.
«Aýa raıynyń qolaısyzdyǵyna baılanysty ekinshi aýysymnyń 0-9 synyp oqýshylary qashyqtan oqý formatyna aýystyryldy», - dep habarlady elordanyń bilim basqarmasy.
Túske qaraı qala mańyna qatynaıtyn avtobýstar toqtatyldy. «City Transportation Systems» JShS qoǵamdyq kólikterdiń júrmeýin aýa raıynyń qolaısyzdyǵynan birqatar joldyń jabylýymen baılanystyrdy.
Sondaı-aq boranǵa baılanysty elorda áýejaıynyń jumys kestesine shekteýler qoıyldy. Atap aıtqanda, Astanadan ushatyn 7 reıs jáne ushyp keletin 8 reıs toqtatyldy.
Áýejaı málimetinshe, búgin elorda áýejaıynda 72 reıs josparlanǵan bolatyn. Onyń ishinde ushatyn 7 reıs, ushyp keletin 8 reıs toqtatyldy. Sonymen qatar, ushýǵa 6 reıs, al ushyp kelýge 12 reıs ýaqyty keshiktirildi. Bul kidirister men toqtatýlar qolaısyz meteojaǵdaılarmen jáne ushý qaýipsizdigin qamtamasyz etý boıynsha qabyldanyp jatqan sharalarmen baılanysty.
Keshikken jáne toqtatylǵan áýe reısteri týraly aqparatty Astana halyqaralyq áýejaıynyń resmı saıtynan nn-airport.kz qaraýǵa bolady. Sondaı-aq elorda áýejaıynda táýlik boıy baılanys ortalyǵy jumys isteıdi: 8(7172) 702-999.
Odan bólek, Astanada avtokóliktiń kóshe ortasynda aýdarylyp qalǵany týraly habarlaǵan edik.
Osy oraıda Polıtsııa departamenti aýa raıynyń qolaısyzdyǵyna baılanysty júrgizýshilerge jolda muqııat bolýdy, jyldamdyq pen araqashyqtyq rejımin qatań saqtaýdy eskertedi.
Aýa raıynyń qolaısyzdyǵyna baılanysty Astana qalasynyń ákimi Jeńis Qasymbek elordalyqtarǵa úndeý jasady.
«Boran men qatty jelge baılanysty qalanyń barlyq qyzmeti kúsheıtilgen rejımde jumys istep jatyr. Kommýnaldyq qyzmetter táýlik boıy qala kóshelerin qardan tazartyp, qajet jaǵdaıda joldar men trotýarlarǵa qum-tuz qospasyn sebýdi jalǵastyrýda. Qart kisiler men balalar jaraqat almas úshin syrtqa shyqpaǵany jón», - dep jazdy elorda ákimi Instagram-daǵy paraqshasynda.
Sonymen qatar qala basshysy júrgizýshiler men jaıaý júrginshiler jolda óte muqııat bolyp, araqashyqtyqty jáne jol qozǵalysynyń barlyq erejesin saqtaýy kerektigin eskertti.
«Sol sııaqty aýa raıynyń ózgerýi jáne engizilgen shekteýler, onyń ishinde qalanyń tas joldaryna qatysty aqparatty nazarda ustaýdy suraımyn», - deıdi J. Qasymbek.
