Astanada boran soǵyp, - 33 gradýsqa deıin sýytady
ASTANA. QazAqparat - Sınoptıkter elordada aldaǵy úsh kún boıy qatty jel soǵatynyn boljap otyr, dep habarlaıdy astana.kz.
Qazgıdrometortalyǵynyń habarlaýynsha, 21 jeltoqsanda Astanada kóshpeli bult shyǵyp, oqtyn-oqtyn qar jaýady. Túnde jáne tańerteń burqasyn bolady. Ońtústik-batystan soqqan jel soltústik-shyǵysqa aýysyp, jyldamdyǵy 9-14 m/s jetedi, túnde jáne tańerteń 15-20 m/s deıin kúsheıedi. Al synap baǵanasy túnde -13...-15°S deıin tómendeıdi.
22 jeltoqsanda da osyndaı aýa raıy saqtalady, kún bultty, oqtyn-oqtyn qar jaýady, burqasyn turady. Ońtústik-shyǵystan 9-14 m/s jyldamdyqpen soqqan jel 15-20 m/s deıin kúsheıedi. Aýa temperatýrasy túnde -22...-24°S, kúndiz -12...-14°S.
23 jeltoqsanda kóshpeli bult shyǵady, oqtyn-oqtyn qar jaýady, burqasyn turady. 15-20 m/s jyldamdyqpen jel soǵady, aýa temperatýrasy túnde -31...-33°S, kúndiz -21...-23°S.
Osy ýaqytta elordanyń kommýnaldyq qyzmetteri kúsheıtilgen rejimde jumys isteýde. Ótken táýlikte, 20-21 jeltoqsanda qala boıynsha 2 093 arnaıy tehnıka jumys istedi. Qalany qar men muzdan sanıtarlyq tazartýǵa 2 524 jol jumyskeri tartyldy. 634 t. m qum-tuz qospasy, 29,5 tonna «Aısmelt» reagenti sebildi. 42 980 t. m qar jınaldy.
Astana qalasy Tótenshe jaǵdaılar departamentiniń habarlaýynsha, jeldiń kúsheıýine jáne joldyń nashar kórinýine baılanysty halyqaralyq tasjoldar men respýblıkalyq mańyzdaǵy magıstraldarda engizilgen shekteýler saqtalýda.
