Astanada boran saldarynan áýe reısteri keshigip jatyr
ASTANA. QazAqparat - Dál qazir Astanadaǵy qatty jel saldarynan «Astana halyqaralyq áýejaıyna ushyp keletin 10 reıs, ushyp shyǵatyn 8 reıs keshigýde. Bul týraly QazAqparat tilshisine «Astana halyqaralyq áýejaıy» AQ-nyń marketıng jáne qoǵammen baılanys bóliminiń jetekshisi Lıýdmıla Kopeıchýk málim etti.
«Astanada jeldiń jyldamdyǵy sekýndyna 18-22 metrge jetip tur. Degenmen, boljam boıynsha, keshki saǵat 18.00-den keıin jeldiń jyldamdyǵy sekýndyna 15 metrge deıin báseńdeıdi. Qazir Astanaǵa ushyp keletin 10 reıs, Astanadan ushyp ketetin 8 reıs keshigýde. Keshigý ýaqyty 3-10 saǵat», - dedi ol.
Astana áýejaıynyń elekrondy tablosyndaǵy jańarǵan aqparatqa súıensek, el ishinde Almaty, Óskemen, Atyraý, Pavlodar, Aqtóbe, Jezqazǵan qalalaryna, syrtqy reıster boıynsha Máskeý men Ekaterınbýrg qalalaryna ushatyn reıster keshigip otyr. Keshigip jatqan reıster týraly tolyq aqparatty myna siltemege ótip, bile alasyzdar: https://ru.astanaairport.kz/?page_id=253
