Astanada boran: Qar jınaý jumystaryna 2800 arnaıy tehnıka jumyldyryldy
ASTANA. QazAqparat - Búgin Astanada aýa raıynyń qolaısyzdyǵyna baılanysty 2795 birlik arnaıy tehnıka qar jınaý jumystaryna tartyldy, sonyń ishinde 775 samosval, 294 soqa-şetka jabdyǵy bar traktor tehnıkasy, 288 tıegish, 112 sypyrý mashınasy jáne t.b. 2400 jýyq jumysker qala kóshelerindegi qardy tez tazalaý jumystaryna jumyldyryldy.
Nysandardy qardan tazalaý úshin vedomstvoǵa qarasty uıymdardan qosymsha jumys kúshi tartyldy. Qardy polıgonǵa aparý úshin túnde jumys isteıtin brıgadalar quryldy.
Ústimizdegi jyly 29 jeltoqsandaǵy jaǵdaı boıynsha, qar polıgonyna 816 742 tekshe m qar shyǵaryldy, 15 371,5 tekshe m qum-tuz qospasy tóseldi.
Sınoptıkterdiń boljamdaryna sáıkes, búgin elordada kún bultty, qar jaýyp, burqasyn bolady. Ońtústik-batystan, batystan 9-14 m/s jyldamdyqpen jel soǵady, keı jerlerde ekpini 15-20 m/s jetedi. Túnde jáne kúndiz aýa temperatýrasy mınýs 5-7°S bolady.
Erteń, 30 jeltoqsanda Astanada kún ala bultty bolady, qar jaýady, boran, ońtústik-batystan 9-14 m/s jyldamdyqpen jel soǵady. Aýa temperatýrasy kúndiz mınýs 7-9°S, túnde - 10-12°S sýyq bolady.
31 jeltoqsanda kóshpeli bult shyǵady, qar jaýady, ońtústik-batystan 9-14 m/s jyldamdyqpen jel soǵady. Aýa temperatýrasy kúndiz mınýs 8-10°S, túnde - 15-17°S deıin tómendeıdi, dep habarlaıdy astana.kz.
