Astanada boran: Qalyń qar men qatty jel qalanyń mazasyn qashyryp tur
ASTANA. KAZINFORM — Birneshe kúnnen beri Qazaqstannyń astanasynda qalyń qar jaýyp, boran soǵyp tur. Kommýnaldyq qyzmetter táýlik boıy jumys istegenine qaramastan, qala stıhııalyq ahýaldan arylatyn emes.
Astana ákimdiginiń habarlaýynsha, 21 qańtar kúni tańerteńnen beri qardy tazalaýǵa 2700-den astam jumysshy men 1600-den astam arnaıy tehnıka jumyldyrylǵan. Bir túnde Astanadan 31 myń tekshe metr qar shyǵarylyp, 2509 sapar jasaldy.
Ortalyq kóshelerdi, qoǵamdyq kólik baǵyttaryn, aıaldamalar men trotýarlardy tazartýǵa barynsha kúsh salynýda. Degenmen, jaýyn-shashyn mólsheri men qatty jel tazalyq jumystaryn qıyndata túsýde.
21 qańtar kúni keshke qarly boran qala joldarynda kólik keptelisin týdyrdy. 2GIS derekteri boıynsha keptelis 8 ballǵa jetti.
CTS birqatar qala mańyndaǵy baǵyttardyń, sonyń ishinde №318, sondaı-aq №305, 310, 312, 315, 316, 317, 327, 328 jáne 329 baǵyttarynyń jumysyn ýaqytsha toqtatqanyn habarlady.
Aýa raıynyń qolaısyzdyǵy Astana áýejaıynda reıstiń keshigýine sebep boldy. Áýejaıdyń baspasóz qyzmeti 21 qańtar kúni saǵat 14:00-den 22 qańtar kúni saǵat 11:00-ge deıin qolaısyz aýa raıy boljamy týraly eskertti:
Jeldiń ekpini - 22 m/s deıin;
Aýa temperatýrasy - kúndiz -2°C, túnde -18°C;
Túnde kóriný - 500 m deıin.
Jolaýshylardan áýejaıdyń veb-saıtyndaǵy sońǵy aqparatty qadaǵalaý nemese 8 (7172) 702-999 telefony boıynsha baılanys ortalyǵyna habarlasý usynylady.
Sondaı-aq Astana Tótenshe jaǵdaılar departamenti «Astana-Qorǵaljyn» tas jolynda (19–124 km) kóliktiń barlyq túrlerine qozǵalysqa shekteýler jarııalady.
Qutqarýshylar 112 qyzmetiniń eskertýlerine qulaq asýdy jáne qala syrtyna shyǵýdan bas tartýdy qatań túrde usynady.
Buǵan deıin aýa raıy qolaısyzdyǵynan dalada qalǵan jolaýshylarǵa qosymsha poıyz jiberildi.