Astanada bopsalaýmen aınalysqan qylmystyq toptardyń áreketi toqtatyldy

ASTANA. KAZINFORM – Astana qalalyq polıtsııasynyń jedel is-sharalarynyń nátıjesinde elimizdiń ártúrli óńirinen qylmystyq jolmen baıý maqsatynda kelgen birneshe qylmystyq toptyń áreketi toqtatyldy, dep habarlaıdy Polisia.kz.

Maýsym aıynyń basynda uıymdasqan qylmysqa qarsy kúres basqarmasynyń qyzmetkerleri bopsalaý jáne alaıaqtyq áreketterge qatysy bar úsh uıymdasqan toptyń múshelerin ustady. Olar elorda aýmaǵynda zańsyz áreketterdi júzege asyrýǵa tyrysqany anyqtaldy.

- Bir epızodta kúdiktiler azamattardy qarý qoldanamyz dep qorqytyp, 10 mıllıon teńgege deıin aqsha bopsalaǵan.

Taǵy bir jaǵdaıda qaladaǵy bazarlardyń birinde kásipkerlerden júıeli túrde aqsha bopsalaý arqyly olardyń qyzmetine kóleńkeli baqylaý ornatpaq bolǵan.

Tergeý sharalary barysynda travmatıkalyq jáne sýyq qarý, oq-dáriler, sondaı-aq qylmystyq shemalarda qoldanylǵan bolýy múmkin mıkrokarjy uıymdarynyń qujattary tárkilendi. Barlyq kúdiktiler qamaýǵa alyndy. Tergeý amaldary júrgizilýde, - dedi ІІM uıymdasqan qylmysqa qarsy kúres departamentiniń ókili Qýandyq Alpys.

Aıta keteıik, Astanada kámeletke tolmaǵan baladan aqsha bopsalaǵandar 10 jylǵa sottaldy.