Astanada Bolon úderisiniń perspektıvalary talqylanýda
ASTANA. QazAqparat - Búgin Astanada Qazaqstannyń Bolon protsesindegi teń tóraǵalyǵynyń sheńberinde «Bolon qurylymdyq reformalary: tájirıbeler, problemalar, perspektıvalar» taqyrybyna arnalǵan halyqaralyq konferentsııa ótti.
«Nazarbaev Ýnıversıtetinde» Eýropalyq joǵary bilim keńistiginiń halyqaralyq sarapshylary, akademııalyq qoǵamdastyq ókilderi, qazaqstandyq jáne sheteldik joǵary oqý oryndarynyń ókilderi bas qosqan osy sharada negizinen jahandaný áleminde Bolon protsesiniń qaǵıdattaryn ilgeriletý jónindegi perspektıvalardy anyqtaý jáne ózara tájirıbe almasý kózdelip otyr. Konferentsııanyń basty taqyryby biliktilik mejelerimen, oqytý nátıjeleri jáne joǵary bilim sapasyn kepildendirý júıesimen baılanystyrylýda.
Aıta ketý kerek, 2010 jyly Qazaqstan eýropalyq bilim keńistigine qosylǵan Ortalyq Azııadaǵy alǵashqy memleket atanǵan bolatyn. Bolon qurylymdyq reformalarynyń kóbisi Qazaqstannyń joǵary bilim salasyndaǵy basymdyqtarymen sáıkes. Atap aıtqanda, joǵary bilimniń sapasy men qoljetimdiligi, JOO túlekteriniń ulttyq mansap júıesi, joǵary bilimdi qarjylandyrýdaǵy tıimdilik pen nátıjelik, ınjenerlik jáne úzilissiz kóptildik bilim júıesiniń damýy, bilim salasyndaǵy áleýmettik jaýapkershilik júıesiniń damýy sııaqty máseleler.
