Astanada bolǵan órtten 5 jasar bala zardap shekti
ASTANA. Qańtardyń 10-y. QazAqparat - Keshe, qańtardyń 9-y kúni Astana qalasynda bolǵan órt oqıǵalarynda eki adam zardap shekti, onyń biri 5 jastaǵy bala,
dep habarlady Tótenshe jaǵdaılar mınıstrliginen.
Máselen, Saryarqa aýdany Novaıa kóshesinde ornalasqan dúkenderdiń birinen shyqqan órt 40 sharshy metr aýmaqty sharpyp, onyń saldarynan 27 jastaǵy dúkenshi kúıik jaraqattarymen aýrýhanaǵa jetkizildi. Tilsiz jaý Astana qalasy boıynsha TJD órtke qarsy qyzmetiniń kúshimen 1 saǵattan keıin aýyzdyqtaldy.
Sondaı-aq Almaty aýdany Molodejnyı shaǵynaýdanyndaǵy 7 qabatty turǵyn úıdegi páterlerdiń birinde órt bolyp, kómirqyshqyl gazyna ýlanǵan 5 jastaǵy bala aýrýhanaǵa jetkizildi.
Bir sharshy metr aýmaqqa taraǵan jalyndy qalalyq órtke qarsy qyzmettiń 11 adamy 4 tehnıkasynyń kúshimen 28 mınýtta sóndirildi.
