Astanada bolǵan órtke baılanysty qylmystyq is qozǵaldy - brıfıng
ASTANA. Qarashanyń 10-y. QazAqparat /Gúlmıra Álıakparova/ - Anyqtalǵan derekter boıynsha, keshe Astana qalasynyń mańynda bolǵan iri órttiń saldarynan 14 adam, onyń ishinde Reseı Federatsııasynyń 4 azamaty qaıtys boldy.
Bul týraly búgin ótken brıfıng barysynda Astana qalasy Іshki ister departamenti bastyǵynyń birinshi orynbasary Arman Orazalıev málim etti, dep habarlaıdy QazAqparat.
«Qazirgi ýaqyttaǵy jaǵdaı boıynsha 14 adamnyń shyǵyny bar, taǵy eki adam «ıis tııý» dıagnozymen aýrýhanada jatyr. Olardyń jaǵdaıy turaqty», - dep atap ótti ol.
Esterińizge sala keteıik, dúısenbi kúni keshke Almaty aýdany, 96-shy kósheniń №7 úı meken-jaıynda «Astana Prom» JShS-niń tapsyrysymen salynyp jatqan Astana qalasynyń ındýstrııalyq parkiniń astyqty saqtaıtyn óndiristik kesheninde iri órt boldy. Órt týraly habarlama 16 saǵat 47 mınýtta kelip tústi.
A.Orazalıevtyń aıtýynsha, aldyn ala boljam boıynsha órt qurylys jumystaryn júrgizý barysynda shyqqan. Jalynnyń sharpyǵan jalpy aýmaǵy - 11 myń sharshy metr.
Búgin atalmysh oqıǵa boıynsha QR Qylmystyq kodeksiniń 256 baby, 2 tarmaqshasy boıynsha (ólimge ákep soqtyrǵan, qaýipsizdik erejelerin saqtamaý) qylmystyq is qozǵaldy. Aıta keteıik, atalmysh bap jeti jylǵa deıin bas bostandyqtan aıyrýdy kózdeıdi.
