Astanada «Bolashaq» túlegine qatysty sot otyrysy ótti
ASTANA. KAZINFORM – Astana qalasynyń Azamattyq ister jónindegi aýdanaralyq sotynda «Halyqaralyq baǵdarlamalar ortalyǵy» AQ-nyń Maqpal Dáribaeva men Natalıa Vorobevadan qaryzdy óndirý týraly aryzy boıynsha sot otyrysy ótti.
Aıta keteıik, Valerııa Gavrılenko «Bolashaq» baǵdarlamasymen Ulybrıtanııaǵa oqýǵa ketip, sodan qaıtqysy joq. Oqý aqshasyn tolyq tólemese de, kepilge qoıǵan múlkin shyǵaryp alǵan. Al Halyqaralyq baǵdarlamalar ortalyǵy bolsa oqýdyń aqshasyn, ıaǵnı 30 mln teńge memleket qarjysyn garant bolǵan úshinshi taraptan talap etip otyr.
Úshinshi tarap dep otyrǵanymyz Valerııa Gavrılenkoǵa garant bolǵan burynǵy áriptesteri - Maqpal Dáribaeva men Natalıa Vorobeva. Belgili bolǵandaı, 2016 jyly «Bolashaq» stıpendııasynyń ıegeri atanǵan V.Gavrılenko «Qyzdar, kómektesińder! Men 2 úıimdi kepildikke qoıamyn, senderge eshqandaı qaýip tónbeıdi. Men oqýymdy bitirip, elge oralamyn» dep eki áriptesin garant bolýǵa kóndirgen. Osylaısha, áriptesteri kepilge jetpeı turǵan 6 mln teńgege garant bolǵan.
Valerııa Gavrılenko ózi kepilge qoıǵan eki páterdi 2019 jyly shyǵaryp alǵan. Sol ýaqyttan beri shetelde turyp jatyr. 2021 jyly «Bolashaq» Maqpal Dáribaeva men Natalıa Vorobevaǵa sot arqyly shaǵym túsirgen. Halyqaralyq baǵdarlamalar ortalyǵy daýdy medıatsııa tártibimen retteý týraly ótinishpen júgingen. Negizgi boryshker Valerııa Gavrılenkony da tartý boıynsha ótinish bildirgen.
Búgingi sot otyrysynda sýdıa daýdyń medıatsııa tártibimen sheshilýi úshin sot protsesin keıinge qaldyrdy. Alaıda jaýapker Maqpal Dáribaeva densaýlyǵyna baılanysty kezekti sot otyrysyna qatyspaýy múmkin ekenin aıtyp, sotta sóz sóıleýdi surady.
«2016 jyly kepildik kelisimge qol qoıǵan kezde Gavrılenkonyń 2 páterdi kepil retinde tirkegenin bildim. Sol úshin de garant bolýǵa kelistim. «Bolashaqtyń» bizdiń ústimizden sotqa bergen shaǵymy negizsiz dep esepteımin. Olar ózderi 2 páterdi zańsyz berip jibergen. Endi búkil qaryzdy bizdiń moınymyzǵa ilmekshi. Mınıstr Saıasat Nurbek aıtqan kelisim joq dep oılaımyz. Olar birjaqty túrde qaryzdy bizden óndirip almaqshy. Nelikten sot bul isti birde-bir kepil bolmaǵandaı qarastyryp otyr? Ádildik qaıda? Sottan talapty qanaǵattandyrýdan bas tartýdy talap etemiz», - dedi ol.
Sottalýshylardyń advokaty Aıjan Alına nesıe berýshiniń kináli ekenin alǵa tartyp otyr.
«Halyqaralyq baǵdarlamalar ortalyǵy basshysynyń kepilge qoıylǵan múlikti kepilden bosatýǵa qol qoıǵanyn kórip otyrmyz. Páterler kepilden shyǵarylyp, basqa adamdardyń atyna aýdarylǵan. Qazir ol úıde Gavrılenkonyń anasy turyp jatyr degen aqparat bar. Kredıtordyń ózi zańsyz áreketterinen kepilsiz qalyp otyr. Eger kepil zattan aıyrylmasa, garant bolǵan jandar sot zalynda kóz jasyn súrtip otyrmas ta edi», - dedi Aıjan Alına.
Advokattyń aıtýynsha, kepildik týraly shart boıynsha jáne kepildik týraly Azamattyq kodekstiń erejesine sáıkes kepilgerler negizgi boryshker mindetin oryndaǵanǵa deıin jaýapty bolady.
«Biraq kepildik sharty oqytýdy uıymdastyrý týraly shartqa baılanysty. 2022 jyly bul mindettemeler sharttan sot sheshimine aýysqandyqtan, shart óz kúshin toqtatty. Endi Gavrılenkonyń mindettemesi sharttan emes, sottyń sheshiminen týyndaıdy, al kepildik sharty oqytý shartynyń oryndalýyn qamtamasyz etti. Meniń oıymsha jáne osyndaı sot sheshimderin shyǵarǵan adam retinde aıtarym, qazir kepildik berýshilerge talap qoıý múmkin emes», - dedi ol.
Ekinshi jaýapker Natalıa Vorobeva Gavrılenko baılanysqa shyǵyp, keshirim suraý bylaı tursyn, ózin bul baǵdarlamanyń qurbany ekenin aıtqan.
Esterińizge salsaq, buǵan deıin Ǵylym jáne joǵary bilim mınıstri Saıasat Nurbek «Bolashaq» baǵdarlamasynyń shartyn buzǵan túlek týraly pikir bildirgen bolatyn.
