Astanada «Bolashaq» stıpendııasynyń adamı kapıtaldy damytýǵa qosqan úlesi týraly monografııanyń tusaýkeseri ótti

BAQ ókilderi jáne bas redaktorlarmen kezdesýde redaktsııalyq alqa músheleri kitapta kóterilgen basty másele - «Bolashaq» baǵdarlamasynyń túlekteri Prezıdenttik stıpendııa júzege asqan jyldarda eldiń sapalyq adamı kapıtalyn damytýǵa qandaı úles qosqanyn talqylady.

«Qazaqstan úshin «Bolashaq» stıpendııasy búgingi kúnge deıin bilimge negizdelgen ekonomıkany qurýdyń negizgi quraldarynyń biri bolyp tabylady. Búgin kóptegen halyqaralyq stıpendııalar týraly birqatar iri jáne tereń zertteýlerdi kezdestirýge bolady. Bizdegi «Bolashaq» baǵdarlamasyn basqa elderdegi áriptesterimiz de belsendi zerttep jatyr. Sonymen qatar osy taqyryp aıasynda stıpendıanttardyń ózderiniń, Nazarbaev ýnıversıtetiniń professorlarynyń taqyryptyq zertteýleri bar. Kóptegen maqalalar men suhbattar jarııalanyp otyrady. Biraq tereń, jınaqtalǵan zertteýler áli az. Osyǵan baılanysty «Bolashaq» stıpendııasynyń eldiń adamı jáne áleýmettik kapıtalyn damytýdaǵy tıimdiligi men úlesi týraly zertteýler júrgizý óte mańyzdy», - dedi Saıasat Nurbek.

Monografııanyń redaktsııalyq alqasy quramyna «Bolashaq» baǵdarlamasynyń túlekteri jáne «Bolashaq» qaýymdastyǵynyń músheleri enip otyr. Avtorlyq ujymnyń jetekshisi «Bolashaq» qaýymdastyǵynyń múshesi, «Nur Otan» partııasynyń qoǵamdyq saıasat ınstıtýtynyń dırektory Saıasat Nurbek.

Aıta keteıik, Qoǵamdyq saıasat ınstıtýty ótken jyly baǵdarlamaǵa shaǵyn áleýmettik zertteý júrgizdi. Baǵdarlama túlekteri, jumys berýshiler men sarapshylarǵa saýalnama júrgizý arqyly birqatar zańdylyqtar aıqyndaldy. Respondentterdiń kópshiliginiń oıynsha (83% bolashaqtyqtar) baǵdarlama qazaqstandyq joǵary oqý oryndarynda qoljetimsiz bilim alýǵa kómektesedi, sondaı-aq sarapshylardyń kópshiligi (65%) stıpendııa jas mamandar úshin áleýmettik saty rólin atqaratyndyǵyn aıtty.

Esterińizge sala keteıik, «Bolashaq» stıpendııasy Memleket basshysy N.Nazarbaevtyń bastamasy boıynsha 1993 jyldyń 5 qarashasynda taǵaıyndalǵan. 2013 jyly «Bolashaq» baǵdarlamasy stıpendıanttarynyń stıpendııanyń 20 jyldyǵyna arnalǵan mereıtoılyq forýmy ótti. Osy jyldarda «Bolashaq» stıpendııasyna 11 myń adam ıe boldy. Qazir jeti myńnan astam túlek el ekonomıkasynyń túrli salalarynda jumys isteıdi.