Astanada «Bolashaq oıyndary – 2026» týrnıriniń ashylý rásimi ótip jatyr
ASTANA. KAZINFORM – Astanada eń iri halyqaralyq sporttyq týrnırlerdiń biri — «Bolashaq oıyndary - 2026» saıysy bastaldy. Saltanatty ashylý rásimine Memleket basshysy Qasym-Jomart Toqaev jáne Ortalyq Azııa elderiniń prezıdentteri keldi.
Dálirek aıtqanda, saltanatty keshke Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov jáne Tájikstan Prezıdenti Emomalı Rahmon qatysyp jatyr.
Phygital International uıymynyń bas atqarýshy dırektory Denıel Merklı Astana álemdik ınnovatsııalar men fıdjıtal oıyndardyń ortalyǵyna aınalǵanyn atap ótti.
– Búgin biz halyqaralyq sporttyq týrnırdiń bastalýyn ǵana emes, adamzattyń bıik maqsattaryn, ınnovatsııany jáne yntymaqtastyq rýhyn dáriptep otyrmyz. Bul – bolashaqty jańa ıdeıalarǵa ashyq ári olardy júzege asyrýǵa daıyn adamdar qalyptastyrady degen ortaq senimi bar, álemniń túkpir-túkpirinen kelgen elderdi, qaýymdastyqtardy jáne jańashyl jandardy biriktiretin múmkindik. Qazaqstan halqyna seriktestigi men qonaqjaılyǵy jáne osy ıdeıaǵa senim bildirgeni úshin erekshe alǵys aıtqym keledi. Bul oıyndar sizderdiń sport bolashaǵyn qalyptastyrýǵa degen tabandylyqtaryńyzdy jáne álemniń túkpir-túkpirinen kelgen adamdardy osynda, Astanada biriktirýge degen umtylystaryńyzdy aıqyn kórsetedi, – dedi D. Merklı.
Baǵdarlama barysynda týrnırdiń sımvoldyq keıipkerleri – I-Bot, Alem, Ar-Lan jáne I-Lin tanystyryldy.
Ashylý rásiminde qazaqstandyq estrada ókilderi Yenlik, Alpha, Nazar, Ademi jáne Astra toby óner kórsetip jatyr.
Eske salaıyq, «Bolashaq oıyndary – 2026» halyqaralyq týrnıri Astanada 29 shilde men 9 tamyz aralyǵynda ótedi. Jarysqa 34 elden 800-den astam sportshy qatysady. Qazaqstan – bul jarysty qabyldap otyrǵan álemdegi úshinshi memleket.
Týrnır 29 shilde men 9 tamyz aralyǵynda elordanyń birneshe sport nysanynda ótedi. Negizgi jarys alańdary retinde kópfýnktsıonaldy «Barys Arena» muz saraıy, Beeline Arena ulttyq tennıs ortalyǵy, Qazaqstan jeńil atletıka sport kesheni jáne Jaqsylyq Úshkempirov atyndaǵy Jekpe-jek saraıy belgilendi.
12 kún boıy qatysýshylar fıdjıtal-fýtbol, basketbol, hokkeı, jekpe-jek, boks, bı baǵyttary, shýterler, Battle Royale, MOBA, dron jarysy, Battle Bots jáne jańa formattaǵy ózge de sport túrlerinen baq synaıdy.
Bıylǵy týrnırdiń jalpy júlde qory 4,5 mln AQSh dollarynan asady. Sporttyq básekelermen qatar, jankúıerler úshin arnaıy shoý-baǵdarlamalar da uıymdastyrylady.
Aıta keteıik, Prezıdent Teleradıokesheni «Bolashaq oıyndary–2026» týrnıriniń televızııalyq túsirilimin jasaıdy.
Byltyr BAÁ Ábý-Dabı qalasynda Astana Bolashaq oıyndarynyń estafetasyn qabyldaǵan edi.
