Astanada «Bolashaq Oıyndary 2026» bıletteriniń satylymy bastaldy
ASTANA. KAZINFORM — 2026 jyldyń 20 mamyrynan bastap «Bolashaq Oıyndary 2026» (GOTF 2026) halyqaralyq týrnırine bılet satylymy naýqany bastaldy, dep habarlaıdy Sport jáne dene shynyqtyrý isteri komıteti.
Bıletterdi onlaın satý Freedom Ticketon platformasynda júzege asyrylady.
Týrnır 2026 jylǵy 29 shilde — 9 tamyz aralyǵynda Astana qalasynda ótedi. Іs-shara fıdjıtal-sport formatyndaǵy halyqaralyq jarystardyń biri, dástúrli sport pen tsıfrlyq tehnologııalardy biriktiredi.
Jarysqa 50-den astam elden 800-den astam sportshy qatysady dep kútiledi. Qatysýshylar halyqaralyq klýbtyq komandalar quramynda synǵa túsedi.
«Bolashaq Oıyndary 2026» baǵdarlamasyna kelesi dıstsıplınalar engizilgen: fıdjıtal-fýtbol, fıdjıtal-basketbol, korolevalyq shaıqas, fıdjıtal-shýter, fıdjıtal-bı, MOBA (PC), MOBA (mobile) jáne fıdjıtal-jekpe-jek túrleri.
Atalǵan dıstsıplınalar kıbersport pen dástúrli sport elementterin biriktiretin jańa formattaǵy jarystar.
Uıymdastyrýshylardyń derekterine jáne IPSOS halyqaralyq zertteý nátıjelerine sáıkes, «Bolashaq Oıyndary 2025» aýqymdy halyqaralyq qyzyǵýshylyq kórsetti. Týrnır translıatsııalary 461 mıllıonnan astam qaralym jınap, 137 mıllıonnan astam biregeı kórermendi qamtydy. Oqıǵa álemniń jetekshi medıa platformalarynda tikeleı efırde kórsetildi.
«Bolashaq Oıyndary 2026» — sport, tehnologııa jáne tsıfrlyq ındýstrııany biriktiretin halyqaralyq sporttyq ekojúıe.
Mınıstrlik komıteti atalǵan jobanyń Qazaqstanda ótkizilýi eldiń sport salasyn damytý, ınnovatsııalyq sport túrlerin engizý jáne halyqaralyq sporttyq yntymaqtastyqty keńeıtý baǵytyndaǵy basymdyqtarǵa sáıkes keletinin atap ótedi.
— Bıletter sany shekteýli. Satylǵan bıletter qaıtarylmaıdy, — dep eskertti uıymdastyrýshylar.
«Bolashaq Oıyndary 2026» Astanada 2026 jyldyń jazyndaǵy iri halyqaralyq sporttyq is-sharalardyń biri retinde sanalady.
Buǵan deıin Astana 2026 jyly ótetin Bolashaq oıyndarynyń estafetasyn qabyldaǵanyn jazǵanbyz.
