Astanada «Bolashaq gospıtali» І-shi halyqaralyq medıtsınalyq iskerlik forýmy ashyldy

Forýmnyń negizgi uıymdastyrýshysy - «Ulttyq medıtsınalyq holdıngi» AQ. Aıta keteıik, Elbasy N.Nazarbaev Holdıngtiń bazasynda halyqaralyq jetekshi kompanııanyń basqarýyndaǵy «Bolashaq gospıtalin» qurýdy tapsyrǵan bolatyn.

«Qazaqstanda densaýlyq saqtaýdy damytý - árbir qazaqstandyqty, eldiń árbir turǵynyn qol jetimdi, ári sapaly medıtsınalyq kómekpen qamtamasyz etýge baǵyttalǵan memlekettik saıasattyń negizgi basymdyqtarynyń biri bolyp tabylady. Elbasynyń tapsyrmasyna sáıkes densaýlyq saqtaý júıesin neǵurlym qol jetimdi, ashyq jáne zaman talabyna jaýap beretindeı etý úshin, ony kezeń-kezeńimen jetildirý júzege asyrylýda. Bul baǵytta az jumys jasalǵan joq. Biraq medıtsına bir orynda turmaıdy. Aýrýdy emdeý jáne dıagnostıka jasaý ádisterin únemi jetildirip otyrý qajet», dedi forýmnyń ashylýynda sóılegen QR Premer-Mınıstriniń orynbasary Erbol Orynbaev.

E.Orynbaev, bul baǵytta Ulttyq medıtsınalyq holdıngine úlken mindetter júktelip otyrǵandyǵyn atap ótti.

Forýmnyń birinshi kúninde otandyq mamandar men AQSh, Eýropa, Ońtústik-Shyǵys Azııa, TMD elderindegi densaýlyqty saqtaýdy basqarý salasyndaǵy eń úzdik sarapshylar men halyqaralyq uıymdardyń ókilderi sóz sóıleıdi. Ekinshi kúni strategııalyq josparlaý, medıtsınalyq qyzmetterdiń sapasy, aqparattyq tehnologııalar, korporatsııalyq basqarý, bıznes-úrdisterdi ońtaılandyrý jáne qarjy menedjmenti sektsııalary boıynsha aýrýhanalyq basqarý salasyndaǵy qazaqstandyq jáne shet el dáriskerleriniń qatysýymen semınarlar toptamasy ótedi.

Negizgi baıandamashylardyń qatarynda Halyqaralyq Birikken Komıssııasynyń eýropa aımaǵy boıynsha basqarýshy dırektory doktor Karlo Ramponı (Frantsııa), Oklahoma ýnıversıtetiniń professory Asaf ál-Asaf (AQSh) bar.