Astanada bokstan qyzdar arasyndaǵy el chempıonaty bastaldy
ASTANA. QazAqparat - Elordada qyzdar arasyndaǵy bokstan Qazaqstan chempıonaty bastaldy. El birinshiligine 14 aımaqtan kelgen 86 boksshy qyz qatysýda, dep habarlaıdy QazAqparat.
Qazaqstan boks federatsııasynyń málimetinshe, baıraqty básekege álem chempıondary Nazym Qyzaıbaı, Dına Jolaman, Valentına Halzova jáne Lázzat Kúngeıbaeva, sonymen qatar Rıo Olımpıadasynyń qatysýshylary Jaına Shekerbekova men Darıǵa Shákimova qatysady.
Chempıonattyń qorytyndysy boıynsha ulttyq komandanyń jańa quramy jasaqtalady. 2020 jyly Tokıoda ótetin olımpıadanyń aıasynda bapkerler quramy «olımpıadalyq» salmaq dárejeleri 51, 60 jáne 75 kelige erekshe mán beredi. Jazǵy maýsymda Halyqaralyq boks qaýymdastyǵy men halyqaralyq komıteti 57 jáne 69 keli salmaqqa deıingilerdi olımpıada baǵdarlamasyna engizý máselesin qarastyrmaq. Osyǵan oraı ulttyq komandaǵa kirýdi maqsat qoıǵan jáne olımpıadaǵa joldama alǵylary keletin qyzdar arasynda osy bes salmaq naǵyz básekelestikti qyzdyrmaq.
«Biz qazir 2020 jyly Tokıoda ótetin olımpıadalyq kezeńniń basynda turmyz. Biraq ol bosańsýǵa áli de ýaqyt bar degendi bildirmeıdi. Demek, ulttyq komandaǵa ótetin sportshylardy tórt jyl boıy tynbaı jattyǵýlar men qatań básekelestik jarystar kútýde. Sonda ǵana biz óz básekelesterimizden qalys qalmaımyz. Aımaqtarda da qyzdar boksyna erekshe mán berýimiz kerek jáne olar eń jaqsy daıyndyqpen kelgen astanalyq komandadan tájirıbe alǵandaryn qalaımyz. Olımpıdalyq múmkindikterin esepke alǵanda, búgin bastaǵan qyzdarymyzdan erteń elimizdiń ataǵyn shyǵaratyn altyn medaldy kútýge bolady», - dedi ulttyq komandanyń bapkeri Vadım Prısıajnıýk.
Aıta keterligi, chempıonattyń fınaldyq kezdesýleri 8 mamyrda ótedi.
