Astanada bokstan Qazaqstan, Ulybrıtanııa, Reseı jáne Ózbekstan qurama komandalarynyń jekpe-jekteri bastaldy

Úlken tanymaldylyqqa ıe bolǵan jarys osymen tórtinshi jyl ótkizilýde. Týrnırde brıtanııalyq boksshylar alǵash ret qatysýda. Bunyń aldynda komandalyq kezdesýlerge ár jyldary Ázirbaıjan, Úndistan, Reseı, Ózbekstan, Ýkraına jáne Frantsııa quramalary kelip, ózara judyryq túıistirgen bolatyn. Boks súıer qaýym 19 aqpanǵa deıin jalǵasatyn atalmysh matchtardy «Jastar» saraıynda nemese Qazaqstannyń fýtbol federatsııasynyń saıtynan onlaın rejımde tamashalaı alady. Búgin, 16 aqpanda Reseı-Ózbekstan, Ulybrıtanııa-Qazaqstan matchtary ótedi. 17 aqpanda Ulybrıtanııa men Reseı, Ózbekstan men Qazaqstan ózara qolǵap túıistirmek. 19 aqpanda Ulybrıtanııa Ózbekstanmen, Reseı Qazaqstanmen kúsh synasady. Qurama komandalardyń qatarynda álem chempıonattarynyń birneshe dúrkin júldegerleri, óz elderiniń eń myqty boksshylary kirgen. Qazaqstan sapynda Birjan Jaqypov, Erlan Tamemov, Qaırat Eralıev, Berik Ábdirahmanov, Almasbek Álibekov, Aıdar Ámirzaqov, Danııar Eleýsinov, Saparbaı Aıdarov, Ádilbek Nııazymbetov, Jan Kosobýtskıı bar. "Bul kontınetaldyq nemese álem chempıonaty emes. Bul - joldastyq kezdesý. Munda árbir qurama óziniń myqty jáne álsiz tustaryn baǵamdap, ózine qorytyndy jasaıdy. Sondyqtan bul tórt eldi biriktirgen týrnır negizinen tájirıbe jınaqtaý úshin uıymdastyryldy", - deıdi Qazaqstan ulttyq quramasynyń bapkeri Myrzaǵalı Aıtjanov.