Astanada boksshy Baqtııar Artaevtyń qurmetine arnalǵan halyqaralyq týrnır ótedi

ASTANA. KAZINFORM – Elordada bokstan Afına Olımpıadasynyń chempıony, Vel Barker kýbogynyń ıegeri Baqtııar Artaevtyń qurmetine arnalǵan  jasóspirimder arasynda halyqaralyq sport dodasy ótedi. 

Dańyqty boksshymyz Artaevtyń qurmetine arnalǵan týrnır resmı jarystar kúntizbesine endi. Atalmysh básekege Qazaqstannyń túkpir-túkpirinen jáne Ózbekstan, Qyrǵyzstan, Ázerbaıjan sııaqty kórshi memleketterden 300-ge jýyq bylǵary qolǵap sheberi qatysyp, synǵa túsedi.

Boks týrnıri 2 jas deńgeıi boıynsha ótedi. Jalpy 14 salmaqta jeńimpazdar anyqtalady. Júldege ıe bolǵan sportshylarǵa qarjylaı syıaqy tabystalmaq. 

Halyqaralyq týrnır Astana tórindegi «Bılaın Arena» saraıynda ótedi.

Aıta ketý kerek, Baqtııar Artaev atyndaǵy baıraqty báseke alǵash uıymdastyrylǵaly otyr.

Eske salaıyq, boksshy osydan týra 20 jyl buryn, ıaǵnı, Afına Olımpıadasynda top jarǵan bolatyn. Qazaqstandyq sportshylar arasynan jalǵyz ózi altynǵa qol sozyp, eldiń abyroıyn asqaqtatty. Sondaı-aq álem chempıonattary men Azııa birinshilikterinde birneshe ret jeńis tuǵyrynan kórindi.