Astanada bochchadan tuńǵysh ret Álem kýbogynyń kezeńi ótedi
ASTANA. KAZINFORM — Elordada 1-9 maýsym kúnderi tuńǵysh ret bedeldi halyqaralyq «Astana 2026 World Boccia Cup» týrnıri ótedi. Bul — Paralımpıadaǵa barar joldaǵy negizgi týrnır, dep habarlaıdy Astana ákimdiginiń resmı saıty.
Bul — resmı reıtıngtik jarystar júıesine kiretin jáne aldaǵy Los-Andjelestegi Paralımpıada oıyndaryna irikteýdiń eń mańyzdy kezeńi sanalatyn bochchadan Álem kýbogynyń kezeńi.
Jarystyń uıymdastyrýshysy — Qazaqstan bochcha federatsııasy.
Týrnır Qazaqstan Respýblıkasynyń 2026 jylǵa arnalǵan sporttyq-buqaralyq is-sharalardyń Biryńǵaı kúntizbelik josparyna resmı túrde engizilgen jáne zamanaýı «Qazaqstan» jeńil atletıka sport kesheni bazasynda ótedi.
Álem kýbogyna Qazaqstan, Brazılııa, Kanada, Qytaı, Ulybrıtanııa, Ońtústik Koreıa, Frantsııa, Portýgalııa elderin qosa alǵanda, 24 eldiń ókilderi qatysady.
Álemniń eń myqty 92 parasportshysy, sondaı-aq olarǵa ilesip júretin 143 maman men delegatsııa músheleri keledi dep kútilip otyr. Óz úıimizde ótetin Álem kýbogynyń kezeńinde el namysyn 10 myqty sportshy qorǵaıdy.
Qatysýshylardyń qatarynda Astana qalasynyń ókilderi: Itıana Shyńǵyshanova, Temirlan Altynsary, Erhat Almat bar.
Uıymdastyrý komıteti atap ótkendeı, mundaı aýqymdy jarysty ótkizý Qazaqstannyń paralımpıadalyq sport salasyndaǵy halyqaralyq ımıdjin nyǵaıtýǵa, sondaı-aq eldiń eń iri álemdik starttarǵa uıymdastyrýshylyq jáne ınfraqurylymdyq daıyndyǵynyń joǵary deńgeıin kórsetýge múmkindik beredi.
«Astana 2026 World Boccia Cup» týrnıri QR Týrızm jáne sport mınıstrliginiń, Astana qalasy ákimdiginiń, «Samuryq-Qazyna» AQ, «Sport Qory» týrızm jáne sport ındýstrııasyn qoldaý qorynyń, Eurasian Resources Group (ERG), KAZ Minerals, Kinopark jáne basqa da seriktesterdiń qoldaýymen ótedi.
Jarys baǵdarlamasy:
• 1 maýsym — komandalardyń kelýi, jattyǵý kúni jáne klassıfıkatsııa (jabdyqtardy tekserý);
• 2 maýsym saǵat 18:00–de — týrnırdiń saltanatty ashylý rásimi;
• 3-6 maýsym — jekeleı jarystar;
• 6 maýsym — jekelegen jeńimpazdardy marapattaý rásimi;
• 6–8 maýsym — juptyq jáne komandalyq jarystar;
• 8 maýsym — juptyq jáne komandalyq razrıadtar boıynsha jeńimpazdardy marapattaý rásimi;
• 9 maýsym — delegatsııalardyń attanýy.
Buǵan deıin byltyr Astanadaǵy Jaqsylyq Úshkempirov atyndaǵy Jekpe-jek saraıynda bochchadan elimizde alǵash ret halyqaralyq jarys ótken bolatyn.
