Astanada bochchadan alǵash ret halyqaralyq jarys ótip jatyr
ASTANA. KAZINFORM — Astanadaǵy Jaqsylyq Úshkempirov atyndaǵy Jekpe-jek saraıynda bochchadan elimizde alǵash ret halyqaralyq jarys ótip jatyr, dep habarlaıdy elorda ákimdiginiń resmı saıty.
Halyqaralyq bochcha federatsııasy (BISFed) aıasyndaǵy irikteý jarysynda sportshylar 2028 jyly Los-Andjeleste ótetin Paralımpıada oıyndaryna reıtıngtik upaı jınaıdy.
Osy oraıda Qazaqstandaǵy básekede Ońtústik Koreıa, Taıpeı, Sıngapýr, Úndistan, Italııa, BAÁ, Ózbekstan, Kıpr, Iran, Saýd Arabııasy, Ázerbaıjan, Mysyr jáne elimizden 56 para sportshy bas qosyp, 4 sanat boıynsha júldeni sarapqa salady.
— Bul bedeldi halyqaralyq saıys — elimiz úshin erekshe jáne bárimizdi jigerlendiretin mańyzdy oqıǵa. Qazaqstanda bochcha tarıhynyń bastalǵanyna kóp ýaqyt ótken joq. Naqty aıtqanda, 2018 jyly múmkindigi shekteýli balalardyń ata-analarynyń bastamasymen birinshi bochcha úıirmesi ashylǵan kezden bastaý alady. Bul qadam jarqyn sátterge jańa jol ashty. 2021 jyly Qazaqstandyq bochcha federatsııasy quryldy. Sodan beri federatsııanyń, ata-analar men jattyqtyrýshylardyń birlesken kúsh-jigeriniń arqasynda Qazaqstanda bochcha qarqyndy damýda. Qazirgi tańda elimizdiń 20 qalasynda 250-den astam múmkindigi shekteýli balalar men eresekter turaqty túrde jattyǵyp keledi. Jyl ótken saıyn sportshylardyń qatary kóbeıip, bochchanyń tanymaldyǵy arta túsýde. Bıyl Astanada ınklıýzıvti sport ortalyǵynyń qurylysy bastaldy. Bul nysan bizdiń bochchıster úshin biregeı oryn jáne elimizde parasportty damytýǵa arnalǵan mańyzdy alań bolmaq. 2023 jyly Hanchjoýda ótken Azııa para oıyndarynda bizdiń komanda jalpy esepte 8-orynǵa taban tiredi. 2024 jyly sportshylarymyz óz kórsetkishterin odan ári jaqsarta tústi. Sonyń nátıjesinde paraatletterimiz bedeldi halyqaralyq jarystarda júldelerge ıe boldy. Osyndaı jetistikter para sportshylardyń jeke sheberligi men komandalyq rýhynyń jarqyn kórinisi ekeni anyq. Búginde Qazaqstan álemde 19-orynda tur. Al Ortalyq Azııada kósh bastap tur. Ulttyq quramamyzda 40-tan astam sportshy bar. Olardyń ishindegi úzdik 10 atlet búgingi týrnırge qatysýda. Aldaǵy kúnderde bizdiń bochchıster jaqsy nátıje kórsetedi dep senemiz, — dedi Parlament Senatynyń tóraǵasy, Qazaqstan bochcha federatsııasynyń prezıdenti Máýlen Áshimbaev sharanyń saltanatty ashylýynda.
Atalmysh jarys 2025 jyldyń álemdik jarys kúntizbesi boıynsha besinshi márte uıymdastyrylyp jatyr. Qazaqstanǵa deıin bıyl World Boccia Challenger jarysy Chılı, Bahreın, Fınlıandııa, Polsha elderinde ótip úlgerdi. Elimiz bul básekeni birinshi ret ótkizýge múmkindik alsa da, qurama sapynda tájirıbeli sportshylarymyz barshylyq. Atap aıtsaq, Almat Erzat, Qýanysh Asqarbekov, Itıana Shyńǵyshanova, Anastasııa Kýtýrman syndy otandastarymyz sheteldik dodalarda júlde alyp úlgerdi.
Sonyń arqasynda jerlesterimiz álemdik reıtıngke de kirdi. Olardyń arasynan eń joǵarǵy 17-satyda Qýanysh Asqarbekov (BC1 sanaty) tur.
— Astana 2025 World Boccia Challenger týrnırine Taıpeı, Malaızııa, Úndistan, Japonııa, Aýstralııa, Ispanııa jáne Qazaqstan elderiniń tóreshileri qazylyq etedi. Keshe arnaıy semınar ótkizdik. Osyndaı jarystardyń arqasynda Qazaqstan jańa deńgeıge shyǵady dep úmittenemin. Qazirgi sátte bochchadan Azııa qurlyǵynyń básekelestigi óte joǵary. Tipti álemdik reıtıngke úńilseńiz, bastapqy TOP-5-ten Qytaı, Indonezııa, Japonııa, Ońtústik Koreıa, Taılandty baıqaısyz. Endi aldaǵy ýaqytta Qazaqstan da básekege qabiletti bolady dep oılaımyn, — dedi Ispanııadan kelgen Kalverol Laýro Marııa Tereza atty tóreshi.
Endi 27 tamyzǵa deıin jalǵasatyn álemdik dodada sportshylar B1, B2, B3, B4 sanaty jáne juptyq, komandalyq saıystarda júldegerlerdi anyqtaıtyn bolady.
Osydan buryn Máýlen Áshimbaev bochchany damytý — ınklıýzııa mádenıetin qalyptastyrý jolyndaǵy ozyq úlgi ekenin aıtqan edi.