Astana 2026 World Boccia Cup: Astanada álemniń úzdik parasportshylary baq synap jatyr
ASTANA. KAZINFORM — Elordadaǵy Qazaqstan jeńil atletıkalyq sport kesheninde Astana 2026 World Boccia Cup halyqaralyq týrnıriniń saltanatty ashylý rásimi ótti. Bul týraly Astana qalasynyń ákimdigi málim etti.
Ákimdiktiń málimetinshe, bul báseke bochchadan Álem kýbogynyń kezeńi bolyp sanalady. Bedeldi saıysqa 24 eldiń parasportshylary qatysyp jatyr.
Saltanatty rásimge memlekettik organdardyń ókilderi, halyqaralyq uıymdardyń músheleri, sportshylar men jattyqtyrýshylar qatysty.
— Eń aldymen barshańyzdy bochchadan Álem kýbogynyń ashylýymen quttyqtaımyn! Elimizdiń Prezıdenti Qasym-Jomart Kemeluly sportty damytýǵa jáne barshaǵa teń múmkindik qalyptastyrýǵa basa mán berip keledi. Sonyń erekshe kórinisi — elordamyzda uıymdastyrylyp otyrǵan búgingi sporttyq is-shara. Astana 2026 World Boccia Cup týrnıri Qazaqstanda alǵash ret uıymdastyrylyp otyr. Astana tórinde osyndaı mańyzdy halyqaralyq jarysty ótkizý biz úshin úlken mártebe. Bul doda elimizde parasporttyń qarqyndy damyp kele jatqanyn jáne bochchaǵa degen qyzyǵýshylyqtyń artyp otyrǵanyn kórsetetin aıtýly oqıǵa. Álem kýbogy tartysty básekege toly bolady dep senemin. Barlyq parasportshylarǵa sáttilik tileımin! Álem kýbogynyń ashylýy barshańyzǵa qutty bolsyn, — dedi QR Senatynyń tóraǵasy, Qazaqstan bochcha federatsııasynyń prezıdenti Máýlen Áshimbaev.
Uıymdastyrýshylardyń málimetinshe, bıylǵy Álem kýbogyna Qazaqstan, Brazılııa, Kanada, Qytaı, Ulybrıtanııa, Frantsııa, Portýgalııa, Ońtústik Koreıa jáne ózge de memleketterden barlyǵy 90 parasportshy qatysyp jatyr.
Sondaı-aq jarysqa kelgen delegatsııa músheleri men mamandardyń sany 140-tan asady.
QR Bochcha federatsııasynyń vıtse-prezıdenti Nazym Janǵazy týrnırdiń halyqaralyq mańyzyna toqtaldy.
— Bul sharaǵa álemniń 24 elinen qonaqtar keldi. Atap aıtqanda, 90 parasportshy jáne olardyń shamamen 150 ókili qatysyp otyr. Búginde Qazaqstan, onyń ishinde Astana qalasy álemniń túkpir-túkpirinen kelgen parasportshylardyń basyn qosqan halyqaralyq parasporttyq ári dıplomatııalyq alańǵa aınaldy deýge bolady. Bul Álem kýbogy 2028 jyly Los-Andjeleste ótetin Paralımpıada oıyndaryna irikteý kezeńderiniń biri sanalady. Sondyqtan Qazaqstan atynan qatysyp jatqan 10 bochcha sportshysy sátti óner kórsetip, irikteýden ótse, 2028 jylǵy Los-Andjeles Paralımpıadasynda el namysyn qorǵaýǵa múmkindik alady, — dedi Nazym Janǵazy.
Aıta keteıik, Qazaqstan quramasy atynan Álem kýbogynda 10 sportshy baq synaıdy. Olardyń qatarynda BC3 sanatyndaǵy sportshylar da bar. Bul sanattaǵy qatysýshylar arnaıy rampanyń kómegimen jarysqa túsedi.
3-6 maýsym aralyǵynda jekeleı saıystar ótse, 6-8 maýsym kúnderi juptyq jáne komandalyq básekeler uıymdastyrylady.
Buǵan deıin Astanadaǵy Jaqsylyq Úshkempirov atyndaǵy Jekpe-jek saraıynda bochchadan elimizde alǵash ret halyqaralyq jarys ótken bolatyn.
