Astanada Bóbekter úıine túsken sábıden týberkýlez aýrýy tabyldy
ASTANA. QazAqparat - Astana qalasynyń mamandandyrylǵan bóbekter úıine qabyldanǵan úsh jasar sábıden týberkýlez aýrýy anyqtaldy, dep habarlaıdy QazAqparat Astana qalasynyń ákimdigine silteme jasap.
2018 jyldyń 8 tamyzynda №1 qalalyq balalar aýrýhanasynan Astana qalasynyń mamandandyrylǵan bóbekter úıine 2015 jyly týǵan K. esimdi bala tastandy retinde túsken.
«Balalar úıine qabyldaıtyn kezde búldirshin tolyq tekserýden ótti jáne jańa kelýshi retinde oqshaýlandy. Tekserý jumystaryna sáıkes, 2018 jyldyń 10 tamyzynda balaǵa Mantý ekpe synamasy jasaldy. 13 tamyz kúni ekpege áseri oń bolyp, ftızıopedıatrǵa konsýltatsııaǵa jiberildi. Sol kúni balany ftızıopedıatr tekserdi jáne tolyqqandy tekserý taǵaıyndady» delingen Astana ákimdiginiń baspasóz qyzmeti taratqan resmı habarlamada.
Zertteý nátıjesi boıynsha, 2018 jyldyń 11 qyrkúıeginde balaǵa «Keýdeishilik lımfa túıinderiniń týberkýlezi» dıagnozy qoıylǵan jáne týberkýlezge qarsy dıspanserge jatqyzylǵan.
«Qazirgi ýaqytta naýqas sol dıspanserde jatyr. Aıta ketý kerek, keýdeishilik lımfa túıinderiniń týberkýlezi kishkentaı balalarda asqynbaı jeńil ótedi jáne aınalaǵa esh qaýip týǵyzbaıdy», - dep eskertti ákimdik.
Sondaı-aq, ákimdiktiń habarlaýynsha, Bóbekter úıiniń barlyq qyzmetkerleri jyl saıyn profılaktıkalyq tekserýden ótedi jáne olardyń sanıtarlyq kitapshalary bar.
