Astanada bloger Erbolat Janabylovqa qatysty sot otyrysy ótip jatyr
ASTANA. KAZINFORM – Astananyń ákimshilik quqyq buzýshylyq jónindegi mamandandyrylǵan aýdanaralyq sotynda bloger Erbolat Janabylovqa qatysty is qaralyp jatyr.
Sot ashyq formatta ótip jatyr. Sot zalynda blogerdiń ózi advokatymen, Týrızm jáne sport mınıstrligi ókilderi, sondaı-aq jýrnalıster qatysyp otyr.
Eske sala ketsek, Erbolat Janabylov pen Elmıra Tólegenovanyń áreketin Týrızm jáne sport mınıstrligi nazaryna aldy. Blogerler Instagram jelisinde 11 avtokólikti oınatatynyn habarlaǵan edi. Sharty da qarapaıym kóringen, ıaǵnı bar bolǵany jelide repost jasaý kerek. Alaıda 21 tamyzda qatysýshylar tikeleı efırdiń ornyna quny 30 myń teńge turatyn aqyly bıznes kýrs satyp alý kerek bolyp shyqty. Baıqaýǵa qatysý tek sol kýrsty satyp alǵannan keıin ǵana múmkin bolatyny anyqtaldy. Bul jaǵdaı qatysýshylardyń narazylyǵyn týdyryp, olar quqyq qorǵaý organdarynan atalǵan shemanyń zańdylyǵyn tekserýdi surady.
2025 jylǵy 26 tamyzda Erbolat Janabylovqa qatysty Ákimshilik quqyq buzýshylyq týraly kodeksiniń 445-1-babynyń 6-bóligi boıynsha ákimshilik quqyq buzýshylyq týraly hattama toltyryldy jáne onyń advokatynyń ótinishi boıynsha is Astana qalasynyń ákimshilik sotyna joldandy.
Mınıstr jelide avtokólikterdi utysqa tikken blogerlerge qatysty túsinik berdi.