Astanada bilim berý uıymdarynda oqýshylardyń qaýipsizdigi qalaı qamtamasyz etiledi
ASTANA. KAZINFORM — Elordanyń Polıtsııa departamenti oqýshylardyń qaýipsizdigi men qorǵalý deńgeıin arttyrý maqsatynda qalalyq Bilim basqarmasymen birlesip, bilim berý nysandaryndaǵy beınebaqylaý júıelerin polıtsııanyń Jedel basqarý ortalyǵyna qosý jobasyn jalǵastyryp jatyr, dep habarlaıdy qala ákimdiginiń resmı saıty.
Polıtsııa departamentiniń málimetinshe, búginde Jedel basqarý ortalyǵyna qaladaǵy 230-dan astam bilim berý mekemesiniń beınebaqylaý kameralary men dabyl túımeleri qosylǵan. Jalpy alǵanda, balabaqshalarda, mektepterde, kolledjder men joǵary oqý oryndarynda ornatylǵan 9 300-den astam kamera baqylaýda tur.
Júrgizilgen jumystardyń nátıjesinde ótken jyly qoǵamdyq tártip pen qaýipsizdik talaptaryn buzýdyń 170-ten astam deregi anyqtalǵan. Bıyl jyl basynan beri osyndaı 25 jaǵdaı tirkeldi. Jedel áreket etý oqıǵalardyń aldyn alýǵa jáne bilim berý uıymdarynyń oqýshylary men qyzmetkerleriniń qaýipsizdigin qamtamasyz etýge múmkindik beredi.
Tehnıkalyq jedel áreket etý quraldarymen qatar, polıtsııa naqty ýaqyt rejıminde bilim berý nysandaryndaǵy ahýaldy baqylap otyrady.
Mektepter men balabaqshalarǵa irgeles aýmaqtardyń qaýipsizdigine de erekshe nazar aýdarylady. Oqý oryndarynyń mańyndaǵy jol-kólik jelisine tekserý júrgizilip, jaıaý júrginshiler ótkelderiniń, jol belgileriniń jáne jaryqtandyrý júıesiniń jaǵdaıy qaralady. «Mektep — úı» baǵytyndaǵy oqýshylardyń júrý marshrýttary taldanyp, yqtımal qaýipti ýchaskeler anyqtalyp, olardy qaýipsizdik talaptaryna sáıkestendirý boıynsha sharalar qabyldanady. Sonymen qatar, mektep avtobýstarynyń tehnıkalyq jaı-kúıi men balalardy tasymaldaý talaptarynyń saqtalýy baqylaýǵa alynǵan.
— Kámeletke tolmaǵandar arasyndaǵy quqyqbuzýshylyqtardyń aldyn alý, býllıng pen bopsalaýǵa qarsy is-qımyl, oqý oryndarynyń mańyndaǵy yqtımal qaýipti jaǵdaılardy anyqtaý, sondaı-aq mektep ákimshilikteri men áleýmettik qyzmettermen ózara baılanys turaqty túrde júzege asyrylady. Oqýshylar men ata-analarǵa quqyqtyq saýattylyqty arttyrý, jeke jáne qoǵamdyq qaýipsizdik máseleleri boıynsha túsindirý jumystary júıeli túrde júrgiziledi. Qabyldanyp jatqan barlyq shara polıtsııanyń turaqty baqylaýynda, — delingen habarlamada.
Balalardyń qaýipsizdigin qamtamasyz etý jumysy júıeli sıpatqa ıe. Oqý men damýǵa qolaıly ári qaýipsiz orta qalyptastyrý — polıtsııa, bilim berý uıymdary, ata-analar jáne jalpy qoǵamnyń birlesken eńbeginiń nátıjesi.
Osydan buryn Aqtóbede mektep oqýshysy júkti bolyp, qylmystyq is qozǵalǵany belgili boldy.