Astanada bıznesti ekologııalyq, áleýmettik standarttarǵa beıimdeý máselesi talqylanyp jatyr
Forýmǵa Ulttyq ESG klýbyna múshe jetekshi kásiporyn ókilderi, mınıstrlikter men komıtet ókilderi qatysyp, pikir almasýǵa múmkindik alyp otyr.
Gıbrıdti formatta uıymdastyrylǵan forýmǵa onlaın kórsetilim arqyly eldiń búkil óńirinen qyzyǵýshylyq tanytqandar da qatysýda.
«Bul alań Qazaqstan ekonomıkasynyń kóshin bastap turǵan 70-ten astam kásiporynnyń basyn biriktirip otyr. Byltyr Astana halyqaralyq qarjy ortalyǵynyń alańynda qurylǵan bolatynbyz. Bul forým – osyndaı aýqymda ótkizip otyrǵan tuńǵysh sharamyz. Jańa Qazaqstannyń bıznesi ESG formatta jumys isteýi kerek. Keshe ǵana Úkimettiń jańartylǵan quramy jasaqtalyp bitti. Biz forým alańyn paıdalanyp, jańartylǵan úkimetten bıznes ne kútetinin aıtqymyz keledi. Kún tártibine ekologııalyq, áleýmettik sıpattaǵy, korporatıvti bıznesti ashyq júrgizý máselesi shyqqanyn qalaımyz. Bul messedj eń áýeli kvazımemlekettik sektor men jergilikti ákimdikterge jetse deımiz», - dedi Ulttyq ESG klýbynyń tóraǵasy Aıdar Qazybaev.
Forýmǵa usynylǵan taqyryptar sessııa aıasynda talqylanbaq.
«Eń áýeli bıznes ESG standarttarǵa (áleýmettik, ekologııalyq, koroporatıvti ashyqtyq standarttary – red.) ótýi úshin memleket qandaı jaǵdaı jasaý kerek degen saýalǵa eki tarap bolyp jaýap izdeımiz. Odan keıingi kezekte mádenıet, bilim, densaýlyq saqtaý salalaryn damytý arqyly Jańa Qazaqstan halqyn baqytty etýdiń tetikteri talqylanady. Sondaı-aq, bıznesti tsıfrlandyrý, ESG standarttarǵa transformatsııalaý máselesi talqyǵa túsedi. Bizdiń klýbqa ekinshi deńgeıdegi bankterdiń bári, taý-ken salasyndaǵy alpaýyt kásiporyndar, munaı sektorynyń jetekshi oıynshylary, «Samuryq-Qazynanyń» quramyndaǵy kompanııalardyń teń jartysy kiredi. Bir jyldyń ishinde otandyq bızneske «jasyl» ınvestıtsııanyń ne ekenin túsindire aldyq deýge bolady. «Otbasy banktiń» jasyl ıpoteka ashqany, Freedom Finance uıymynyń Araldy qutqarý qorymen birge ekologııalyq sertıfıkat máselesin qolǵa alǵany soǵan mysal bola alady», - dedi klýb tóraǵasy.
