Astanada bıznesmen jol polıtsııasy ınspektoryna oq atty
ASTANA. 8 qarasha. QazAqparat /Gúlmıra Álıakparova/ - Astanada bıznesmen qujattardy teksermek bolǵan jol polıtsııasy ınspektoryna qarsy oq atty. Bul týraly QazAqparat agenttigine Jol polıtsııasy basqarmasynan málim etti.
Oqıǵa 4 qarasha kúni saǵat túngi 11 jarym shamasynda Respýblıka dańǵyly boıynda oryn alǵan. Máselen, Jol polıtsııasy basqarmasynyń qyzmetkerleri qaýipsizdik beldigin taqpaǵany úshin 36 jastaǵy júrgizýshiniń basqarýyndaǵy «Toıota Kamrı» avtokóligin toqtatqan.
Biraq júrgizýshige qatysty ákimshilik hattamany toltyrý barysynda avtokólik salonynan bir jolaýshy shyǵyp, «Lıder» úlgisindegi jaraqattaıtyn tapanshany B.Orazbaev esimdi polıtseıge qaraı baǵyttaǵan. Ekinshi polıtseı D.Jumalın 33 jastaǵy jolaýshy, keıin anyqtalǵandaı kásipkerdiń qolyn burap, qorǵaný áreketin jasaǵan. Biraq kásipker tapanshadan atyp úlgergen. Abyroı bolǵanda jaraqattanýshylar joq. Buzaqynyń qolynan tapansha alynyp, oqıǵa ornyna Astana qalasynyń Іshki ister departamenti Shuǵyl-tergeý toby shaqyryldy.
Saraptama nátıjesine sáıkes, kásipker alkogoldi ishimdiktiń «jeńil áserinde» bolǵan, al júrgizýshige qatysty saraptama min tappaǵan. Kásipkerdiń polıtseıge qarsy oq atýynyń sebebi áli anyqtalǵan joq.
Aıta keteıik, ózge buqaralyq aqparat quraldarynda buǵan deıin habarlanǵan aqparattarǵa sáıkes, kásipkerdiń atqan oǵy astanalyq polıtseılermen birge kezekshilikke shyqqan, EQYU sammıti qarsańynda elorda kóshelerindegi tártipti kúsheıtýge shaqyrylǵan pavlodarlyq polıtseıge baǵyttaldy.
